გლდანის ციხესთან სამოქალაქო აქტივისტები შეიკრიბნენ და ივერი მელაშვილს, ნატალია ილიჩოვასა და გიორგი რურუას ახალი წელი მიულოცეს. მათ ციხის შენობასთან ფრანები გაუშვეს.

გიორგი რურუას ცოლის, სოფო სიხარულიძის თქმით, მისი სურვილია ისინი იყვნენ პოლიტიკური ნიშნით დაპატიმრებული ბოლო ადამიანები ქვეყანაში.

"ვულოცავ ყველას ახალ წელს, უკეთესი წელი გვქონოდეს. განსაკუთრებით, ვულოცავ პოლიტპატიმრებს და ჩემს მეუღლეს, გიორგი რურუას. ვუსურვებ მალე გათავისუფლებას და სახლში დაბრუნებას", — ამბობს სიხარულიძე ფორმულასთან კომენტარში.

გლდანის ციხესთან იმყოფებოდა ევროპული საქართველოს ყოფილი წევრი, ელენე ხოშტარიაც, რომელმაც ადგილზე გოზინაყი მიიტანა.

"არ არსებობს წამი, როდესაც ჩვენ არა ვართ პოლიტპატიმრების გვერდზე და შეუძლებელია, რომ დღეს უბრალოდ შეირგო ახალი წელი, ან იფიქრო შემდეგ წელზე, ან რაღაცა აღნიშნო და არ იფიქრო ამ ადამიანებზე, რომლებიც სრულიად უსამართლოდ არიან გამომწყვდეულები", — განაცხადა ხოშტარიამ ფორმულასთან კომენტარში.

იგი იმედოვნებს, რომ 2021 წელი იქნება თავისუფლების წელი ამ ადამიანებისთვის.

"ძალიან დიდი იმედი მაქვს, რომ ჩვენ შემდეგ წელს მაინც ციხესთან და უსამართლობის გაპროტესტებით აღარ მოგვიწევს აღნიშვნას, რომელიც ყველასთვის სასიხარულო უნდა იყოს, მაგრამ, ვერ იქნება სიხარული სრული, თუ ადამიანები იჩაგრებიან ამ დროს", — განაცხადა ელენე ხოშტარიამ.

შეგახსენებთ, რომ ივერი მელაშვილს, ნატალია ილიჩოვასა და გიორგი რურუას ოპოზიცია პოლიტპატიმრებად მიიჩნევს. მათი გათავისუფლება ოპოზიციის ერთ-ერთი ძირითადი მოთხოვნა იყო ქართულ ოცნებასთან მოლაპარაკებებისას, რომელიც ფასილიტატორი ელჩების შუამავლობით, 31 ოქტომბრის საპარლამენტო არჩევნების შემდეგ მიმდინარეობს.

ივერი მელაშვილი და ნატალია ილიჩოვა 7 ოქტომბერს, საქართველო-აზერბაიჯანის საზღვრის დელიმიტაცია-დემარკაციის საქმეზე დააკავეს. ოპოზიცია მიმდინარე გამოძიებას წინასაარჩევნო პროცესს უკავშირებდა.

მთავარი არხის მეწილე, გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. სასამართლომ მას 4-წლიანი პატიმრობა შეუფარდა.

მმართველი პარტია ქვეყანაში პოლიტპატიმრების არსებობას უარყოფს.

გაიგეთ მეტი: