საქართველოს პარლამენტის თავმჯდომარის, არჩილ თალაკვაძის განცხადებით, მმართველი ძალა არათუ არ გამორიცხავს ოპოზიციასთან პირდაპირ დიალოგს, არამედ მაქსიმალურად გამოიყენებს ამის რესურსსაც. ამის შესახებ მან რუსთავის 2-ის ეთერში ისაუბრა.

"რა თქმა უნდა ჩვენი სურვილია, რომ ოპოზიცია რაც შეიძლება დროულად ჩაერთოს საპარლამენტო პროცესში. ამ ყველაფერთან ერთად ვაგრძელებთ დიალოგს და არ გამოვრიცხავთ, ასევე და მაქსიმალურად გამოვიყენებთ ოპოზიციასთან პირდაპირი მოლაპარაკებების რესურსს. თუმცა დიალოგის საბოლოო შეჯამება და მისი დახურვა დადებითი შედეგით ჩვენ წარმოგვიდგენია მიმდინარე დიალოგის ფარგლებში", — განაცხადა თალაკვაძემ.

ქართული ოცნების აღმასრულებელმა მდივანმა, ირაკლი კობახიძემ გუშინ, ღამის კურიერის ეთერში განაცხადა, რომ ოპოზიციური პარტიების უმრავლესობასთან ფასილიტატორი ელჩების გარეშეც ჰქონდათ კომუნიკაცია.

"მე შემიძლია გითხრათ, რომ ამ პარტიების უმრავლესობასთან სხვადასხვა ტიპის კომუნიკაცია შედგა [...] ეს კომუნიკაცია შედგა უმრავლესობასთან ამ პარტიების, ანუ, უმრავლესობა არის მინიმუმ ხუთი რვიდან", — განაცხადა ირაკლი კობახიძემ.

კობახიძის თქმით, ინდივიდუალური მოლაპარაკებების გამართვა მმართველ პარტიასა და ცალკეულ ოპოზიციურ პარტიებს შორის საერთაშორისო პარტნიორების მოწოდებაც იყო.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.