რუსეთის საგამოძიებო კომიტეტმა ოპოზიციონერი ალექსეი ნავალნის წინააღმდეგ თაღლითობის ბრალდებით გამოძიება დაიწყო. იგი მისი ორგანიზაციებისთვის შეწირული თანხების გაფლანგვაშია ეჭვმიტანილი.

როგორც რუსულ საგამოძიებო უწყებაში ამტკიცებენ, ნავალნიმ ფონდებისთვის შეწირული 558 მლნ რუბლიდან (7,5 მლნ დოლარიდან) პირადი მიზნებისთვის 356 მლნ რუბლი (4,8 მლნ დოლარი) გახარჯა. მათივე თქმით, ეს თანხა ქონების შეძენასა და ხარჯების ანაზღაურებას, მათ შორის უცხოეთში დასვენებას მოხმარდა. საგამოძიებო კომიტეტი აზუსტებს, რომ საუბარია ხუთ ორგანიზაციაზე მათ შორის, კორუფციასთან ბრძოლის ფონდზე.

"პუტინი, როგორც ჩანს, ისტერიკაშია", — ასე გამოეხმაურა გამოძიებას ალექსეი ნავალნი, რომელიც ნოვიჩოკით მოწამვლის შემდეგ გერმანიაში ცხოვრობს.

ნავალნის შტაბის ხელმძღვანელის, ლეონიდ ვოლკოვის თქმით, რუსეთის ხელისუფლება ახალ გაზებს პოულობს, რათა ოპოზიციონერმა ქვეყანაში დაბრუნება ვერ შეძლოს.

გამოძიების დაწყებას გამოეხმაურა კრემლის პრესსპიკერი, დიმიტრი პესკოვიც. მისი განმარტებით, პრეზიდენტი ვლადიმერ პუტინი ისტერიკაში არაა, როგორც ეს ნავალნიმ თქვა.

"ვლადიმერ პუტინში ეს სიტუაცია არანაირ განცდას არ იწვევს. ვლადიმერ პუტინში განცდებს იწვევს ის ამოცანები, რომელიც მის და მთავრობის წინაშე დგას", — აღნიშნა პესკოვმა.

20 აგვისტოს ალექსეი ნავალნი ტომსკი-მოსკოვის თვითმფრინავში შეუძლოდ გახდა და გონება დაკარგა, რის შემდეგაც თვითმფრინავი ომსკში დაეშვა და პოლიტიკოსი საავადმყოფოში გადაიყვანეს. რუსი ექიმები აცხადებდნენ, რომ მას სერიოზული არაფერი სჭირდა, თუმცა ოჯახი მოთხოვნის შემდეგ, ნავალნი სამკურნალოდ გერმანიაში გადაიყვანეს.

სექტემბრის დასაწყისში გერმანიის მთავრობამ განაცხადა, რომ ნავალნი ნოვიჩოკის ჯგუფის საწამლავით მოწამლეს. რუსულმა მხარემ მოწამვლასთან ყველანაირი კავშირი უარყო და განაცხადა, რომ ომსკის კლინიკაში გაკეთებულ ანალიზში საწამლავის კვალი არ ჩანდა. ნავალნი კომიდან სექტემბერს გამოვიდა და ამ ეტაპზე თავს კარგად გრძნობს.