ჯორჯიან უოთერ ენდ ფაუერსა და რუსთავის წყალში წყლის ტარიფის გაძვირებასთან დაკავშირებით აცხადებენ, რომ დადგენილი სატარიფო ცვლილება კომპანიის განვითარების გეგმებსა და სამომავლო ინვესტიციებს გარკვეულწილად ზღუდავს.

"საქართველოს ენერგეტიკისა და წყალმომარაგების მარეგულირებელი კომისიის მიერ მიღებული გადაწყვეტილება წყალმომარაგების ტარიფის მატების შესახებ საშუალებას მოგვცემს წყალმომარაგების სტაბილურობა და ხარისხი შევინარჩუნოთ, თუმცა, კომისიის მიერ დადგენილი სატარიფო ცვლილება კომპანიების განვითარების გეგმებსა და სამომავლო ინვესტიციებს გარკვეულწილად ზღუდავს, რაც კიდევ უფრო გააუმჯობესებდა მომსახურების ხარისხსა და კომპანიის შემდგომ განვითარებას", — აცხადებენ ჯორჯიან უოთერ ენდ ფაუერსა და რუსთავის წყალში.

მათივე ცნობით, კომპანიები დღეისათვის წყლით 600 000-ზე მეტ მომხმარებელს უზრუნველყოფენ და 6 600 კმ წყალსადენის ქსელს ემსახურებიან.

ჯორჯიან უოთერ ენდ ფაუერის მომხმარებელისთვის, თბილისსა და მცხეთაში წყლის ტარიფი იზრდება. გარდა ამისა, ახალი ტარიფი განისაზღვრა რუსთავში მაცხოვრებელთათვისაც. გადაწყვეტილება ამის შესახებ სემეკმა 29 დეკემბრის სხდომაზე მიიღო. ტარიფების მოქმედების ვადა 2021 წლის 1 იანვრიდან 2023 წლის 31 დეკემბრის ჩათვლით განისაზღვრა.