ევროპული საქართველოს ყოფილი წევრი, ელენე ხოშტარიას თქმით, რომ საოკუპაციო ხაზთან მცხოვრები ოჯახები მთავრობის მხრიდან ყურადღების ტოტალურ დეფიციტს განიცდიან.

"პრობლემა არის ის, რომ ქვეყანაში, მთავრობის მხრიდან, ეს თემა არის მეასეხარისხოვანი. ადგილზე რომ ჩახვიდეთ, ამ გატაცებული ადამიანების ოჯახის წევრებთან ... არც კი იციან მაგალითად მათი მდგომარეობა; არც წითელ ჯვარს მიმართავს მთავრობა, რომ აქტიურად მუდმივი კომუნიკაცია იყოს, რომ ელემენტარულად იცოდნენ რა მდგომარეობაში არიან რეალურად", — აცხადებს ხოშტარია.

ხოშტარია ამბობს, რომ საქართველოს საერთაშორისო ურთიერთობების წამყვანი საკითხი სწორედ დე ფაქტო საზღვრისპირა სოფლებიდან ადამიანების გატაცება უნდა იყოს.

"პრაქტიკულად, ყოველკვირეულად ადამიანებს იტაცებენ 21-ე საუკუნეში აი ამ საოკუპაციო ხაზებთან. ეს უნდა იყოს ჩვენი საერთაშორისო ერთ-ერთი ყველაზე მძლავრი თემა. ადგილზე არის ტოტალური დეფიციტი ყურადღების ამ ოჯახების მიმართ", — განაცხადა ელენე ხოშტარიამ.

დღეს, 30 დეკემბერს, რუსეთის ყოფილ საელჩოსთან სამოქალაქო აქტივისტებმა ოკუპაცია გააპროტესტეს და საოკუპაციო რეჟიმის მიერ დატყვევებული პირების გათავისუფლება მოითხოვეს. აქციის მონაწილეები ადგილზე ბანერებით მივიდნენ და რამდენიმე წუთით გზის სავალი ნაწილიც დაიკავეს.

ელენე ხოშტარიას თქმით, ასეთი ტიპის აქციები არის საოკუპაციო ხაზთან მცხოვრები ოჯახების მხარდაჭერა და ამ თემის შეხსენება მთავრობისთვის.

გაიგეთ მეტი: