ექიმი ვაჟა გაფრინდაშვილი, რომელიც საოკუპაციო რეჟიმმა გაიტაცა და უკანონოდ ჰყავდა დაკავებული, რუსეთის საელჩოსთან ანტისაოკუპაციო აქციაზე მივიდა. როგორც გაფრინდაშვილმა განაცხადა, თავს ვალდებულად გრძნობს, იყოს იქ, სადაც საქართველოს მომავალია.

"ეს არის საქართველოს ნომერ პირველი პრობლემა, სანამ არ გადაიჭრება საქართველოს მომავალი ყოველთვის საფრთხის ქვეშ იქნება. მოგვეხსენება ეს პრობლემა და ჩათვალეთ, რომ ყველასთვის პრობლემების 50 პროცენტი მოგვარდება. ამიტომ მე თავს ვალდებულად ვგრძნობ, რომ იქ ვიყო სადაც, საქართველოს მომავალია", — განაცხადა გაფრინდაშვილმა On.ge-სთან.

დღეს, 30 დეკემბერს რუსეთის ყოფილ საელჩოსთან სამოქალაქო აქტივისტებმა ოკუპაცია გააპროტესტეს და საოკუპაციო რეჟიმის მიერ დატყვევებული პირების გათავისუფლება მოითხოვეს. აქციის მონაწილეები ადგილზე ბანერებით მივიდნენ და რამდენიმე წუთით გზის სავალი ნაწილიც დაიკავეს. აქციაზე მისული იყვნენ როგორც სამოქალაქო აქტივისტები, ისე ოპოზიციის წარმომადგენლები.