რუსეთის პენიტენციურმა სამსახურმა რუს ოპოზიციონერს, ალექსეი ნავალნის ულტიმატუმი წაუყენა და მოსთხოვა, რომ პარასკევს დილით ის უკვე მოსკოვში იყოს. თუ დათქმულ დროს გადააცილებს, ციხე ელოდება. ინფორმაცია ამის შესახება გამოცემა Reuters-მა გაავრცელა.

ციხის სამსახურის განცხადებით, ნავალნი ამ დრომდე გერმანიაში ყოფნით 2014 წელს მის მიმართ წაყენებულ პირობით სასჯელს არღვევს და გაურბის რუსეთის სამართალდამცავი ორგანოების ზედამხედველობას.

20 აგვისტოს ალექსეი ნავალნი ტომსკი-მოსკოვის თვითმფრინავში შეუძლოდ გახდა და გონება დაკარგა, რის შემდეგაც თვითმფრინავი ომსკში დაეშვა და პოლიტიკოსი საავადმყოფოში გადაიყვანეს.

ნავალნის ახლობლები ითხოვდნენ, რომ იგი სამკურნალოდ უცხოეთში გადაეყვანათ. რუსი ექიმები კი აცხადებდნენ, რომ მძიმე მდგომარეობაში მისი გადაყვანა საშიში იქნებოდა. თუმცა 22 აგვისტოს პოლიტიკოსი გერმანიაში გადაიყვანეს.

სექტემბრის დასაწყისში გერმანიის მთავრობამ განაცხადა, რომ ნავალნი "ნოვიჩოკის" ჯგუფის საწამლავით მოწამლეს. რუსულმა მხარემ მოწამვლასთან ყველანაირი კავშირი უარყო და განაცხადა, რომ ომსკის კლინიკაში გაკეთებულ ანალიზში საწამლავის კვალი არ ჩანდა. ნავალნი კომიდან რამდენიმე თვის წინ გამოვიდა და ამ ეტაპზე თავს კარგად გრძნობს.

ალექსეი ნავალნი პუტინის ყველაზე დიდი ოპოზიციონერია. პოლიტიკური აქტიურობის გამო ის მოსკოვში არაერთხელ დააკავეს და ადმინისტრაციული პატიმრობაც მიუსაჯეს. პირველ ჯერზე საპატიმრო დაწესებულებაში მან ათი დღე გაატარა.