კომპანია ენერგო-პრო ჯორჯიაში აცხადებენ, რომ ელექტროენერგიის ტარიფის მნიშვნელოვანი ზრდა გარდაუვალია და რომ სამომხმარებლო ტარიფის ზრდა აუცილებელია. დღეს მოქმედი ტარიფი წლის ვადით 2018 წლის 1 იანვრიდან დადგინდა.

როგორც ენერგო-პრო ჯორჯიაში განმარტავენ, მოქმედი ტარიფი დიდი ხანია ვერ ანაზღაურებს გაზრდილ ხარჯებს ელექტროენერგიის შესყიდვის თუ სხვა მიმართულებებით.

"უკვე 10 თვეა მწვავე ფინანსურ კრიზისში ვიმყოფებით, მოგვიწია განვითარების ყველა გეგმაზე უარის თქმა, საინვესტიციო პროექტების მნიშვნელოვნად შემცირება, გართულდა სახელფასო ფონდის დაფინანსებაც კი. მიუხედავად აღნიშნული სირთულეებისა, დამფუძნებელი ჯგუფისს და საბანკო სექტორის დახმარებით, მაინც შევძელით ვალდებულებების შესრულება, აგრეთვე შევინარჩუნეთ ყველა თანამშრომელი. თუმცა, საინვესტიციო პროექტების ასეთი შემცირება, ბუნებრივია უარყოფით გავლენას ახდენს მომსახურეობის ხარისხზე და ელექტრომომარაგების უწყვეტობის მაჩვენებლებზე"", — აცხადებს კომპანიის გენერალური დირექტორი, მიხეილ ბოცვაძე.

რაც შეეხება შემდგომ ტარიფს, ბორვცვაძე ამბობს, რომ ეს კომპანიის მოთხოვნად არ უნდა აღიქმებოდეს:

"ყველა ვაცნობიერებთ საკითხის სენსიტიურობას და სოციალურ ფაქტორს, უფრო მეტიც, მნიშვნელოვნად გაზრდილი ტარიფი, ჩვენთვის პრობლემატურ დავალიანებების თუ სხვადასხვა რისკების ზრდას გამოიწვევს".

მისი თქმით, თუ სრულად არ დაფინანსდა შესყიდული ელექტროენერგიის ხარჯი და აუცილებელი საინვესტიციო პროექტები, კომპანია ვერ განაგრძობს ოპერირებას.