ლელოს ერთ-ერთი ლიდერის, მამუკა ხაზარაძის განცხადებით, რიგგარეშე არჩევნები 2022 წელს უნდა დაინიშნოს სრულად პროპორციული წესით და დაიწყოს ახალი 4 წლის ათვლა. ამის შესახებ ხაზარაძემ მთავარი არხის ეთერში ისაუბრა.

"რიგგარეშ არჩევნები ხომ არ გულისხმობს, რომ ოპოზიცია ვითხოვთ ამას, უბრალოდ, სიტუაცია ითხოვს ამას, რომ ქვეყანა გაჯანსაღდეს და ყველას გვეყოს პოლიტიკური პასუხისმგებლობა, რომ მოდი, დავიწყოთ ამ წერტილიდან. პლებისციტი რატომ შემოვიტანეთ? — თუ ვერ ვთანხმდებით ჩვენ, მოდი, ხალხმა გადაწყვიტოს. ეს არა მარტო არჩევნების გადაწყვეტა იქნებოდა, სხვა ვერდიქტი იქნებოდა. ჩემი აზრია, რომ 2022-ში უნდა დაინიშნოს რიგგარეშე არჩევნები სრული პროპორციული და იქიდან უნდა დაიწყო ახალი 4 წლის ათვლა", — განაცხადა მამუკა ხაზარაძემ.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.