საინფორმაციო სააგენტო AP ეგვიპტის ოფიციალურ პირებზე დაყრდნობით ავრცელებს ინფორმაციას, რომ ეგვიპტის ავიახაზების რეისი MS804, რომელიც პარიზი-კაიროს რეისს ასრულებდა, ხმელთაშუა ზღვაში ჩამოვარდა.

ეგვიპტის ავიახაზების ინფორმაციით, Airbus A320 11 277 მეტრ სიმაღლეზე მიფრინავდა და მალევე გაქრა მას შემდეგ, რაც ეგვიპტის საჰაერო სივრცეში შევიდა. მათივე განმარტებით, თვითმფრინავში 56 მგზავრი და ეკიპაჟის 10 წევრი იმყოფებოდა. ბორტზე იყვნენ საფრანგეთის, ეგვიპტის, ბრიტანეთის, პორტუგალიისა და სხვა ქვეყნების მოქალაქეები.

მეტეოროლოგების ინფორმაციით, როდესაც თვითმფრინავმა ხმელთაშუა ზღვა გადაკვეთა, ამინდი კარგი იყო.

შარლ დე გოლის აეროპორტის ცნობით კი, თვითმფრინავი პარიზიდან ღამის 11:09 საათზე აფრინდა. ის კაიროში 4 საათსა და 5 წუთში უნდა ჩაფრენილიყო, თუმცა, აეროპორტში დაშვებამდე 20 წუთით ადრე რადარებიდან გაქრა.

Al Jazeera-ს ინფორმაციით, ეგვიპტელი და ბერძენი მაშველები უკვე მიემართებიან თვითმფრინავის ჩამოვარდნის სავარაუდო ადგილისკენ.