ამერიკის შეერთებული შტატების სენატორი, რესპუბლიკელი ჯონ მაკკეინი პრეზიდენტ ტრამპს აფრთხილებს, რომ თუ რუსეთს სანქციებს მოუხსნის, ის თავის კოლეგებთან ერთად იზრუნებს, რათა რუსეთს სანქციები ამჯერად საკანონმდებლო დონეზე დაუწესდეს.

ჯონ მაკკეინმა ფესიბუკის ოფიციალურ გვერდზე დონალდ ტრამპისა და ვლადიმერ პუტინის 28 იანვრისთვის დაგეგმილ სატელეფონო საუბრამდე, განცხადება გამოაქვეყნა, სადაც წერს:

"პრეზიდენტ დონალდ ტრამპსა და ვლადიმერ პუტინს შორის სატელეფონო საუბარი იმ დროს იმართება, როცა ფართოდაა გავრცელებული სპეკულაციები იმის შესახებ, თითქოს თეთრი სახლი განიხილავს რუსეთისთვის სანქციების მოხსნას. იმედი მაქვს, რომ პრეზიდენტი ტრამპი წერტილს დაუვსამს ამ სპეკულაციებს და უარს იტყვის მსგავს წინდაუხედავ ნაბიჯზე ამერიკის ეროვნული უსაფრთხოებისა და ჩვენი მოკავშირეებისთვის. თუ ის ამას არ იზამ, მე ჩემს კოლეგებთან ერთად ვიმუშავებ, რათა რუსეთის მიმართ სანქციები გამყარდეს კანონის ძალით.

მხოლოდ სამ წელიწადში, რუსეთი, ვლადიმერ პუტინის ხელმძღვანელობით, შეიჭრა უკრაინაში, დაიპყრო ყირიმი, დაემუქრა ნატოს მოკავშირეებს, შეიჭრა სირიაში, დატოვა ნგრევისა და სიკვდილის კვალი, დაარღვია პირობები.

რუსეთის ომმა უკრაინის წინააღმდეგ იმსხვერპლა 10 ათასამდე ჯარისკაცი და მშვიდობიანი მოქალაქე, რუსეთის მიერ მიწოდებული იარაღით ჩამოაგდეს კომერციული თვითმფრინავი უკრაინის თავზე, რასაც 228 უდანაშაულო ადამიანი ემსხვერპლა.

რუსეთმა ნატოს აღმოსავლეთ ფლანგზე მასიურად განათავსა სამხედრო ძალები, ჩაატარა ფართომასშტაბიანი სამხედრო სწავლებები, დაარღვია საკუთარი მეზობლების საზღვრები, საჰაერო სივრცეები, ტერიტორიული წყლები და გააძლიერა პროპაგანდა, რათა ძირი გამოუთხაროს ჩვენი მოკავშირეების მთავრობებს.

რუსეთმა ხელი შეუწყო ასადის მკვლელ რეჟიმს, ეწარმოებინა ომი სირიელი ხალხის წინააღმდეგ, რასაც 400 ათასი სამოქალაქო პირი ემსხვერპლა. რუსეთის სამიზნეს წარმოადგენდა სირიული საავადმყოფოები. ნაცვლად ისლამური სახელმწიფოს წინააღმდეგ ბრძოლისა, ის ფოკუსირებული იყო სირიის ოპოზიციის წინააღმდეგ ბრძოლაზე, რამაც სირიაში მხოლოდ და მხოლოდ გააძლიერა ექსტრემისტული ძალები.

და პუტინის მიერ ჩვენი ქვეყნის აბუჩად აგდებისა და უპატივცემულობის ყველაზე შემზარავი დემონსტრირება იყო რუსეთის მიზანმიმართული ჩარევა ჩვენს უახლოეს არჩევნებში კიბერთავდასხმების საშუალებით, ასევე, კამპანიის დროს დეზინფორმაციის გავრცელებით, რამაც შეასუსტა ამერიკა და დააზიანა დასავლური ღირებულებები.

ჩვენს ბოლო, სამივე პრეზიდენტს რუსეთთან პარტნიორული ურთიერთობის დამყარების დიდი იმედები ჰქონდა. ყველა მცდელობა წარუმატებლად დამთავრდა არა იმიტომ, რომ ამერიკული მხრიდან იყო კეთილსინდისიერებისა და მცდელობის ნაკლებობა, არამედ იმიტომ, რომ პუტინს სურს ჩვენი მტრობა. ჩვენ ვჭირდებით მას როგორც მტერი. ის არასოდეს არ იქნება ჩვენი პარტნიორი, მათ შორის ISIL–თან (იგივე ISIS) ბრძოლაში. მას სჯერა, რომ რუსეთის გაძლიერება ამერიკის დასუსტებას ნიშნავს. პრეზიდენტ ტრამპს ეს უნდა ახსოვდეს, როცა ვლადიმერ პუტინს დაელაპარაკება. მას უნდა ახსოვდეს, რომ სატელეფონო ხაზის მეორე მხარეს არის თავზეხელაღებული მკვლელი, რომელსაც ყოველ ჯერზე სურს ძირი გამოუთხაროს ამერიკის ეროვნულ ინტერესს. თუ ჩვენი მთავარსარდალი სხვაგვარად იფიქრებს, იქნება გულუბრყვილო და საშიში.