ენერგო-პრო ჯორჯიას ინფორმაციით, მესტიაში პოლიციამ აღმოაჩინა კრიპტოვალუტის მწარმოებელი აპარატები, რომლებიც უკანონოდ მოიხმარდნენ ელექტროენერგიას. კომპანიის ინფორმაციით, სასტუმრო ბანგურიანის დამხმარე ფართში განთავსებული აპარატები, დაახლოებით 4-5 საშუალო სოფლის სამყოფ ელექტროენერგიას იტაცებდნენ.

"ელექტროენერგიის გაზრდილ მოხმარებას ფიზიკურად ვერ უძლებს ადგილზე არსებული ელექტროქსელი. ხშირად ხდება ავარიების ფაქტები და კომპანიის თანამშრომლები ცდილობენ დროულად შეაკეთონ მწყობრიდან გამოსული ქსელი, თუმცა ელექტროენერგიის განსაკუთრებით მომატებულ მოხმარებას, კვლავ მწყობრიდან გამოყავს. ამასთან, ენერგო-პრო ჯორჯიას თანამშრომლებს არ აქვთ ადგილზე უსაფრთხოდ გადაადგილების და ელექტროენერგიის დატაცების ფაქტების აღმოჩენის საშუალება", — ვკითხულობთ ელერგო-პრო ჯორჯიას გავრცელებულ განცხადებაში.

მათი ინფორმაციით, მესტიაში, ბოლო ერთი წლის განმავლობაში, მნიშვნელოვნად გაზრდილია ელექტროენერგიის მოხმარება. კომპანიაში აცხადებენ, რომ ამის მიზეზი კრიპტოვალუტის მწარმოებელი პუნქტებია.

"შეიძლება ითქვას, რომ მხოლოდ მესტიის რაიონი, ამ დროისთვის საშუალოდ მოიხმარს 12-14 სხვა რაიონის სამყოფ ელექტროენერგიას", — აცხადებენ კომპანიაში.

ენერგო-პრო ჯორჯია მოუწოდებს შესაბამის ორგანოებს, გააგრძელონ ელექტროენერგიის დატაცების ფაქტების აღმოჩენა.

გაიგეთ მეტი: