ამერიკის შეერთებული შტატების პრეზიდენტი, დონალდ ტრამპი და ბრიტანეთის პრემიერმინისტრი, ტერეზა მეი 27 იანვარს პირველად შეხვდნენ ერთმანეთს მაშ შემდეგ, რაც ტრამპი პრეზიდენტი გახდა.

ეკონომიკურ და სამხედრო თანამშრომლობის საკითხებთან ერთად, მათ არაერთ სხვა მნიშვნელოვან საკითხზეც ისაუბრეს. თეთრ სახლში გამართული ერთობლივი შეხვედრისას, მეისა და ტრამპს დაუსვეს კითხვა იმის შესახებ, თუ რა ბედი ეწევა რუსეთისადმი დაწესებულ სანქციებს, რაც გამოწვეულია რუსეთის მიერ ყირიმის ოკუპაციითა და აღმოსავლეთ უკრაინაში გაჩაღებული საბრძოლო მოქმედებებით.

დონალდ ტრამპის თქმით, რუსეთისთვის სანქციების მოხსნაზე საუბარი ჯერ ნაადრევია:

"თუ ჩვენ შეგვიძლია გვქონდეს შესანიშნავი ურთიერთობა რუსეთთან, ჩინეთთან და ყველა სხვა სახელმწიფოსთან, მე ამის მომხრე ვარ. ამის გარანტია არ არსებობს, მაგრამ თუ ამას შევძლებთ, ეს იქნებოდა პოზიტიური და არა – ნეგატიური".

რაც შეეხება ბრიტანეთის პრემიერმინისტრს, ტერეზა მეიმ თქვა, რომ მას იმედი აქვს, ევროპისა და აშშ–ს მიერ რუსეთისთვის დაწესებული სანქციები იქამდე დარჩება ძალაში, სანამ არ შესრულდება მინსკის შეთანხმება, რაც თავის მხრივ რუსეთს ავალდებულებს, შეწყვიტოს საბრძოლო მოქმედებები აღმოსავლეთ უკრაინაში.

ერთობლივ პრესკონფერენციაზე ასევე ითქვა, რომ დიდი ბრიტანეთის გაერთიანებული სამეფოს დედოფალმა, ელისაბედ მეორემ დონალდ ტრამპი ბრიტანეთში მიიწვია.