ერთიანი ნაციონალური მოძრაობის წევრის, თინა ბოკუჩავას თქმით, ბუნებრივია, რომ მინისტრობის კანდიდატების პარლამენტში წინააღმდეგობა არ ექნებოდათ. მთავარი არხის ეთერში ბოკუჩავამ განაცხადა, რომ მინისტრთა კაბინეტის თითქმის იგივე შემადგენლობის წარდგენა ნიშნავს, რომ ქართულ ოცნებას განახლების რესურსი არ გააჩნია.

"ბუტაფორიად ქცეულ პარლამენტში, ბუნებრივია, რომ მარიონეტების შერჩევის პროცესს, არანაირი წინააღმდეგობა არ ექნებოდა. თავად ის, რომ არანაირი სიახლე ამ მინისტრთა კაბინეტში არ არის, ასევე ადასტურებს იმას, რომ ივანიშვილის რეჟიმს არანაირი განახლების, სიახლის, წარმატების და უკეთესობის რესურსი არ გააჩნია. მხოლოდ ის ადამიანები, ვინც საკუთარი მონური მორჩილებით ინარჩუნებენ ამ თანამდებობებს, მხოლოდ ის ადამიანები დაასახელა ბიძინა ივანიშვილმა", — აცხადებს ბოკუჩავა.

ბოკუჩავა დარწმუნებულია, რომ მთავრობის ეს შემადგენლობა ვერ შეინარჩუნებს ოთხწლიან ლეგიტიმაციას, რადგან, მისივე თქმით, თავად ის პარლამენტია არალეგიტიმური, რომელმაც უნდა დაამტკიცოს მთავრობა.

"მე დარწმუნებული ვარ, რომ ეს არ იქნება გრძელვადიანი მთავრობა. მე დარწმუნებული ვარ, რომ ეს მთავრობა ვერ შეინარჩუნებს ოთხწლიან ლეგიტიმაციას იმიტომ, რომ თავად ის პარლამენტი, სადაც მათ ახლა სრულიად ფორმალურად და ბუტაფორიულად უყრიან კენჭს, თავად ის არ არის ლეგიტიმაციის მატარებელი. იმიტომ, რომ ბიძინა ივანიშვილმა 31 ოქტომბრის არჩევნები მოიპარა", — განაცხადა თინა ბოკუჩავამ.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე, ან მისჯილი აქვს თავისუფლების აღკვეთა.

გაიგეთ მეტი: