საქართველოს ფინანსთა მინისტრ ივანე მაჭავარიანის განცხადებით, თუ რამეში არ არის ქართული ოცნების ბრალი, ეს არის ის, რომ ოპოზიცია დღეს აქ [პარლამენტში] არ არის. მაჭავარიანის თქმით, მმართველმა ძალამ ყველაფერი გააკეთა, რომ ოპოზიცია საკანონმდებლო ორგანოში შესულიყო.

"ის რომ არჩევნები არ არის გაყალბებული ოპოზიციამაც იცის, თქვენზე კარგად იცის, რომ არაა გაყალბებული. არჩევნების შედეგი არ აღმოჩნდა საკმარისი იმისთვის, რომ ოპოზიციის დიდი ნაწილი შემოსულიყო. ეს პრობლემაა, ეს სერიოზული პრობლემაა, მაგრამ ეს არ ნიშნავს იმას, რომ არჩევნების ჩატარებასთან არის რაიმე პრობლემა. ეს ნიშნავს რომ ქართული პოლიტიკური სპექტრი ისე ნაწილდება, რომ, სამწუხაროდ, ხელს უშლის კონსენსუსის მიღწევას.

"ეს დისკომფორტს მიქმნიდა. არ დაგიმალავთ. მერჩივნა, დღეს ოპოზიცია ყოფილიყო, ასევე, მირჩევნია იყოს ბიუჯეტის განხილვის დროს, არა იმიტომ, რომ მსიამოვნებს კრიტიკა, არამედ იმიტომ, რომ თუ არსებობს პატარა შანსი, რომ იქნება კრიტიკა ისეთი, რომელიც რაღაცას გადაგვახედინებს, გაგვაუმჯობესებინებს, გვაიძულებს, რომ რაღაც გავაკეთოთ, ეს კრიტიკა უნდა გამოვიყენოთ. შესაბამისად, ის რომ ოპოზიცია არ შემოდის, არ გეგონოთ, რომ "ოცნებისთვის" ეს კარგია. ეს ჩვენ მოგვადუნებს, ჩვენ გაუმჯობესების შანსს გვიკარგავს და არაა სწორი", — ამბობს მაჭავარიანი.

მისივე თქმით, ქართული ოცნების ლიდერშიპიდან არავინ არის ბედნიერი იმით, რომ ოპოზიცია საკანონმდებლო ორგანოში არ შედის. მისი თქმით, იოლი საპარლამენტო განხილვები ექნებათ. ის, ასევე აღნიშნავს, რომ ჯანსაღი კრიტიკა სჭირდებათ.

"ვიცოდით, რომ 80% და ზოგჯერ 90% არის უსაფუძვლო, პოპულისტური და სპეკულაციებს ემსახურება, მაგრამ რა მნიშვნელობა აქვს. სამი პროცენტიც რომ იყოს ჯანსაღი ისიც იმსახურებს, რომ აისახოს ბიუჯეტში", — აცხადებს მაჭავარიანი.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.