პარლამენტის ვიცე-სპიკერის, გია ვოლსკის განცხადებით, აფრიკის დასახლებაში მცხოვრები ადამიანები სხვა საკუთრებასაც ფლობენ და ზოგერითი "საკმაოდ შეძლებულიც არის".

"ეს არ არის საცხოვრებელი სახლები. ეს არ არის სახლები, სადაც ადამიანმა, რომელსაც სოციალურად უჭირს, თავისი ცხოვრების დანარჩენი ნაწილის გატარება გადაწყვიტა. ეს არის ადამიანთა დიდი ჯგუფი, სიაც გამოქვეყნდა, რომელთაც საკუთრება გააჩნიათ და ზოგიერთი საკმაოდ შეძლებულადაც არის. ადამიანები ხშირ შემთხვევაში არ ცხოვრობდნენ თბილისში, იღებენ გადაწყვეტილებას და გარკვეული მექანიზმებით აღწევენ ამას, სამშენებლო მასალას ყიდულობენ და მოკლე ვადაში, მიუხედავად ათასგზის გაფრთხილებისა, აშენებენ გარკვეულ შენობებს", — აცხადებს ვოლსკი.

თბილისში, აფრიკის დასახლებაში ქალაქის მერიამ შენობა-ნაგებობების დემონტაჟი 15 დეკემბერს დაიწყო. მერიის განცხადებით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 შემთხვევა გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს. პასუხად ადგილობრივებმა განაცხადეს, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.

On.ge-სთან საუბრისას რამდენიმე ადგილობრივმა აღნიშნა, რომ ისინი მრავალშვილიანები არიან და ამ სახლებს წლების განმავლობაში შეგროვებული ფულით იშენებდნენ. მათი თქმით, ხშირად შვილების გამოსაკვები ფულიც არ აქვთ.

მერიის გადაწყვეტილებაზე საზოგადოების კრიტიკის შემდეგ კალაძემ გადაწყვიტა გავრცელებული ფოტოს გმირებს ბინა აჩუქოს.

გაიგეთ მეტი: