საქართველოს სახალხო დამცველი, ნინო ლომჯარია გენდერული იდენტობის ნიშნით ირიბი დისკრიმინაციის დადგენის შესახებ რეკომენდაციით მიმართავს პენიტენციური სამსახურის დირექტორს, გიორგი პატარიძეს.

როგორც ირკვევა, სახალხო დამცველს განცხადებით მიმართა პენიტენციურ დაწესებულებაში მყოფმა ტრანსგენდერმა პირმა, რომელსაც გადიოდა ჰორმონალურ მკურნალობას, თუმცა, თავისუფლების აღკვეთის შემდეგ, ციხის ადმინისტრაცია არ უზრუნველყოფს მას შესაბამისი მედიკამენტით.

სახალხო დამცველის ინფორმაციით, განმცხადებელი თვეების განმავლობაში ითხოვდა ენდოკრინოლოგთან კონსულტაციას, თუმცა ამის ნაცვლად იგი ფსიქიატრს შეახვედრეს.

განცხადებაში ვკითხულობთ, რომ პენიტენციური სამსახურის სამედიცინო დეპარტამენტი მედიკამენტებისა და მკურნალობაზე უარის თქმის მიზეზად ასახელებს იმას, რომ პატიმარს მათთვის არ წარუდგენია ჰორმონალური თერაპიის დამადასტურებელი ცნობა.

"გამომდინარე იქედან, რომ მ. ქ.-ს მკურნალობა და ჰორმონალურ მედიკამენტები დანიშნული აქვს უცხოელი ექიმების მიერ, ხოლო საქართველოში მედიკამენტების შეძენისათვის არ სჭირდებოდა რეცეპტის წარდგენა, მას უცხოელი ექიმებისგან ოფიციალურად არ მიუღია ფორმა N100 და დანიშნულება, რამდენადაც ეს დაკავშირებული იყო გარკვეულ ხარჯებთან", — ვკითხულობთ განცხადებაში.

სახალხო დამცველის ინფორმაციით, აღნიშნულ პირს, გარდა ჰორმონალური მედიკამენტებისა, სჭირდება სპეციალური ვიტამინებიც, რათა ორგანიზმი მომზადებული იყოს სქესის ტრანზიციის ოპერაციისთვის. მ.ქ.-ს ინფორმაციით, ოპერაცია 2020 წლის მარტში უნდა გაეკეთებინა, თუმცა სასჯელაღსრულების დაწესებულებაში მოხვედრის გამო ვერ მოახერხა და ახლა სჭირდება სპეციალური მკურნალობა.

სახალხო დამცველის დასკვნით სახეზეა ირიბი დისკრიმინაცია.

"სქესის ტრანზიციის პროცესში მისთვის აუცილებელია ჰორმონალური მედიკამენტების მიღება. ამდენად, იმ შემთხვევაში, თუ იგი არ იქნება უზრუნველყოფილი მის გენდერულ იდენტობაზე მორგებული სამედიცინო მომსახურებითა და მედიკამენტებით, მისი ჯანმრთელობა საფრთხის ქვეშ დადგება", — ვკითხულობთ სარეკომენდაციო წერილში.

სახალხო დამცველი განმარტავს, რომ აღნიშნული პირი სხვა პატიმრებისგან განსხვავებულ მდგომარეობაშია და შესაბამისად, სჭირდება განსხვავებული მოპყრობა.

"სახეზეა თანაბარ მდგომარეობაში ჩაყენება არსებითად უთანასწორო მდგომარეობაში მყოფი პირებისა, რაც, თავის მხრივ, დისკრიმინაციას წარმოადგენს", — აცხადებს ომბუდსმენი.

მისი თქმით, აუცილებელია აღნიშნული პირის შეუფერხებლად და უწყვეტად უზრუნველყოფა ენდოკრინოლოგიური მომსახურებითა და ჰორმონალური მედიკამენტებით.