აფრიკის დასახლების მკვიდრის, ვალერიან სოლომონიშვილის თქმით, მას შემდეგ, რაც დღეს მერიის მიერ დაწყებული დემონტაჟის პროცესის შედეგად სახლი დაუნგრიეს, სამ შვილთან ერთად "კარკასშია შეკედლებული". მან On.ge-ს უთხრა, რომ დაახლოებით, 6 თვის წინ დაიწყო სახლის მშენებლობა და სახურავამდე მიყვანილი, თითქმის დასრულებული სახლი დაუნგრიეს.

"ეს მიუღებელია იმიტომ, რომ არა მაქვს არაფერი, მყავს სამი პატარა შვილი. ვაშენდები, სახლს ვაკეთებდი და მოვიდნენ, ისიც დამინგრიეს. კარკასში მყავს ბავშვები. დავდივარ, ვმუშაობ, მოვდივარ 2-2 "პაჩკა" ცემენტს ვყიდულობდი, რომ ამეშენებინა, ერთიანი ფული მე არა მაქვს ასაშენებლად. სახურავზე მიყვანილი, გამზადებული, ერთიანად დაანგრიეს. არავინ არ მოსულა [არ გაუფრთხილებია]. ერთადერთი დარბოდა სოზარ სუბარი, ხმა მომეცით, რომ გაგიფორმდებათ ესენი. იხვეწებოდა წინა დღეებში. ვცხოვრობ ახლა კარკასში, მანდ ვარ შეკედლებული დროებით", — განაცხადა მან.

თბილისში, აფრიკის დასახლებაში ქალაქის მერიამ შენობა-ნაგებობების დემონტაჟი დაიწყო. არსებული ინფორმაციით უკვე 20-მდე მშენებარე სახლი დაანგრიეს. ადგილობრივ მოსახლეობასა და პოლიციას შორის ფიზიკური დაპირისპირებაც მოხდა. შედეგად 8 ადამიანი დააკავეს.

აღნიშნულ ფაქტთან დაკავშირებით თბილისის მერმა, კახა კალაძემ განაცხადა, რომ იმ ხალხს აქვს სახლი და მიწა და ეს არის მიწების მიზანმიმართული დატაცება.

"იქ არავინ არ ცხოვრობს, ეს არის დატაცებული მიწები. მიზანმიმართულად ხდება ამ კონკრეტული ტერიტორიების დაკავება, გარკვეული შენობა-ნაგებობების განთავსება, რომ შემდეგ, წლების მერე მოახდინონ ამ მიტაცებული მიწების მითვისება, რაც კატეგორიულად მიუღებელია. ესენი არიან ის ადამიანები, რომელთაც აქვთ სახლები, არიან ის ადამიანები, რომელთაც აქვთ მიწები და ა.შ. არ გამოვრიცხავ, ამის უკან იყვნენ გარკვეული ჯგუფები, რომლებიც ხელს ითბობენ ამაზე", — განაცახად კახა კალაძემ.

რამდენიმე კვირით ადრე ადამიანის უფლებათა სწავლებისა და მონიტორინგის ცენტრმა (EMC) მოუწოდა თბილისის მერიას, არ დაიწყოს მუნიციპალიტეტის ტერიტორიაზე უკანონოდ აშენებული შენობების დემონტაჟი და სახლ-კარის გარეშე არ დატოვოს იქ მცხოვრები ადამიანები.

EMC-ს თქმით, უნებართვოდ აშენებული შენობები, ხშირად, ერთადერთი თავშესაფარია იქ მცხოვრები ადამიანებისთვის და ქალაქის მერის, კახა კალაძის განცხადება, მსგავსი შენობების სასწრაფო დემონტაჟის შესახებ, საფრთხეს უქმნის ადამიანების ჯანმრთელობას და არღვევს ადამიანის უფლებების მინიმალურ სტანდარტებს.