მე-10 მოწვევის პარლამენტის დეპუტატმა, თეა წულუკიანმა ნაციონალური მოძრაობის მიერ სიის ჩახსნასთან დაკავშირებით განაცხადა, რომ მათ ჩახსნეს მხოლოდ ისინი, ვინც ვერ შევიდა პარლამენტში.

"როდესაც ამბობენ, რომ ჩვენ სია ჩავხსენით, მათ ჩახსნეს მხოლოდ ის ადამიანები, ვინც ვერ გავიდნენ. ისინი, ვინც გავიდნენ, ჩახსნილები არ არიან, მაგრამ ამას ამბობენ მორიდებით. ვინც შევიდა პარლამენტში, ისინი დეპუტატები არიან, სანამ ჩვენ არ შევუწყვეტთ უფლებამოსილებას", — განაცხადა თეა წულუკიანმა.

ოპოზიციამ საარჩევნო სიის ჩახსნასთან დაკავშირებით ოფიციალური განცხადებით ცესკოს 11 დეკემბერს, მე-10 მოწვევის პარლამენტის პირველი სხდომის პარალელურად მიმართა. განცხადებით ცესკოს მიმართა ევროპულმა საქართველომ, სტრატეგია აღმაშენებელმა, ენმ — ძალა ერთობაშიამ, ლელომ და ლეიბორისტულმა პარტიამ.

მე-10 მოწვევის პარლამენტის პირველი სხდომის პარალელურად ბარიერგადალახული ოპოზიციური პარტიები მოსწავლე ახალგაზრდობის სასახლის ბაღში შეიკრიბნენ, საპარალამენტო მანდატებზე უარი თქვეს და ამის შესახებ განცხადებას ხელს საჯაროდ მოაწერეს.

პარლამენტის პირველ სხდომას მხოლოდ ქართული ოცნების დეპუტატები ესწრებოდნენ.