ბუა ნუა ტაილანდში 1988 წელს გამოჩნდა და ცხოვრების უმეტესი ნაწილი პატას ზოოპარკში გაატარა, რომელიც ბენგკოკში, ერთ-ერთი მოლის თავზე მდებარეობს.

როდესაც საქმე ცხოველებზე ზრუნვას ეხება, შერს არ სძინავს. ნოემბრის მიწურულს, 74 წლის მომღერალი "მსოფლიოში ყველაზე მარტოსულ სპილოს" კავანს დაეხმარა, რომელიც წლების განმავლობაში, პაკისტანის ზოოპარკში მარტო ცხოვრობდა. სპილოს ახალი სახლი აქვს, სადაც საკმარისი სივრცე და ბევრი სხვა სპილოა, რომლებთან მეგობრობაც შეუძლია.

ფოტო: Four Paws / Hristo Vladev / People

გადარჩენის ოპერაციას ცხოველებზე ზრუნვის საერთაშორისო ორგანიზაცია — ოთხი თათი ხელმძღვანელობდა, პაკისტანის ხელისუფლებასთან, ამერიკელ ბიზნესმენ ერიკ მარგოლისთან და არასამთავრობო ორგანიზაცია Free The Wild-თან ერთად, რომელიც შერის მიერ არის დაფუძნებული. კავანი კამბოჯის დედაქალაქ სიემ-რეაპში, ველური ბუნების დაცვის სახლში გადაიყვანეს. შერი სპილოს პირადადაც შეხვდა.

იხილეთ მარტოსული სპილოს ამბავი:

როგორც გარდიანი წერს, სანამ კავანი ახალ, დაცულ სახლს ეჩვევა და ახალ მეგობრებს ხვდება, შერის ყურადღება ბუა ნუამ მიიპყრო. ბუა ნუა დედალი გორილაა, რომელიც ტაილანდში 1988 წელს აღმოჩნდა და პატას ზოოპარკშია გამოკეტილი.

შერიმ ტაილანდის გარემოს დაცვის მინისტრს მისწერა და შეშფოთება გამოთქვა ცხოველის საცხოვრებელი პირობების გამო, რაც მომცრო გალიას, უმნიშვნელო გონებრივ დატვირთვას და გარესამყაროზე შეზღუდულ წვდომას გულისხმობს.

გარდიანის თანახმად, შერიმ წერილში ბუა ნუას კონგოში უსაფრთხო ტრანსპორტირების ხარჯების დაფარვისთვის მზაობა გამოთქვა.

შერის მიერ დაარსებული ორგანიზაციის დახმარებით არაერთი ცხოველი გადაიყვანეს დაცულ საცხოვრისებში და მაღალი ხარისხის ზოოპარკებში. შერის ზოოპარკიდან ორანგუტანგების, გიბონის და ბონობოს ტრანსპორტირებაც სურს.

Sky News-ის ცნობით, მინისტრი უკვე გამოეხმაურა წერილს და აღნიშნა, რომ ცხოველების ზოოპარკიდან გადაყვანის გეგმაზე მუშაობენ.

"გატყობინებთ, რომ ბუნებრივი რესურსებისა და გარემოს დაცვის სამინისტროს არასდროს დავიწყებია ბუა ნუა. პირადად მე, როგორც მინისტრი, რომელსაც ველური ბუნების კონსერვაცია ევალება, უკვე დავუკავშირდი შესაბამის უწყებებს, რათა ბუა ნუასთვის უკეთესი ცხოვრების გზები გამოინახოს", — აღნიშნული წერილი Sky News-მა გაავრცელა.

პატას ზოოპარკის დირექტორი ბრალდებებს უარყოფს და ამბობს, რომ არცერთი ცხოველი, მათ შორის ბუა ნუა ცუდ პირობებში არ ცხოვრობს.

"ვრცელდება ცილისწამება, რომ ცხოველებს ვაშიმშილებთ, რაც სიმართლე არ არის", —განაცხადა მან — "გორილას ველურ ბუნებაში დაბრუნების მომხრეებს არ ესმით, არ გააჩნიათ ცხოველების შესახებ საკმარისი ცოდნა. ზოოპარკში დაბადებული ცხოველები ველურ პირობებში გადარჩენას ვერ შეძლებენ".

ზოოპარკის დირექტორმა შერი მიიწვია, რათა ადგილზე ნახოს სიტუაცია — "მოვიდეს და ნახოს რამხელა ზრუნვას და სიყვარულს ვიჩენთ გორილას მიმართ".