იუსტიციის ყოფილი მინისტრისა და მე-10 მოწვევის პარლამენტის განათლების, მეცნიერებისა და კულტურის კომიტეტის თავმჯდომარის, თეა წულუკიანის განცხადებით, მას მორალურად სწორი არ ჰგონია, რომ იუსტიციის სამინისტროს 8-წლიანი მმართველობის შემდეგ, დაჯდეს დარგობრივ კომიტეტში და "აკონტროლოს" ადამიანი, რომელმაც მისი საქმე გადაიბარა.

"იყო შემოთავაზება პარტიის მხრიდან, რომ მე საქმიანობა გამეგრძელებინა. მაგრამ ვიმსჯელეთ, შევთანხმდით და გაზიარებული იქნა ჩემი პოზიცია, რომ ახალი სახეების დროა. 8 წელი საკმარისი პერიოდია და არ მგონია სწორი მორალურად, რომ ადამიანმა, რომელმაც მართე 8 წლის განმავლობაში იუსტიციის სამინისტრო, ახლა დაჯდე დარგობრივ კომიტეტში, უჭყიტინო იმ ადამიანს და აკონტროლო ის ადამიანი, რომელმაც შენი საქმე გადაიბარა. ვინც იქნება იუსტიციის მინისტრი, სჭირდება თავისუფლება და თავისი ხედვის განხორციელება", — განაცხადა წულუკიანმა.

მეათე მოწვევის პარლამენტში იუსტიციის ყოფილი მინისტრი, თეა წულუკიანი განათლების, მეცნიერებისა და კულტურის კომიტეტის თავმჯდომარედ აირჩიეს. მან იუსტიციის მინისტრის თანამდებობა 29 სექტემბერს დატოვა.