აზერბაიჯანმა და სომხეთმა ტყვეების გაცვლა დაიწყეს. ამის შესახებ სომხეთის პრემიერმინისტრის, ნიკოლ ფაშინიანის პრესსპიკერი, მანე გევორგიანი ფეისბუქზე წერს, თუმცა დამატებით ინფორმაციას არ ავრცელებს.

‼️ Սպասում ենք մեր գերիների առաջին խմբի վերադարձին:

Posted by Mané Gevorgyan on Monday, 14 December 2020

გარდა ამისა, რადიო თავისუფლების სომხური ბიუროს ინფორმაციით, ტყვეების გაცვლას ადასტურებს აზერბაიჯანის სახელმწიფო კომისია, რომელიც სამხედრო ტყვეებისა და უგზო-უკვლოდ დაკარგულების საკითხებს განიხილავს.

"საერთაშორისო ორგანიზაციებისა და რუსი სამშვიდობოების მონაწილეობით მოლაპარაკებების შედეგად მიღწეულია გაცვლის შეთანხმება "ყველა ყველაზე" და პროცესი უკვე დაწყებულია", — განაცხადეს უწყებაში.

27 სექტემბერს განახლებული საბრძოლო შეტაკებები მთიან ყარაბაღში სომხეთსა და აზერბაიჯანს შორის 9 ნოემბერს მიღწეული შეთანხმების შედეგად დასრულდა, რომლის შუამავალი რუსეთი იყო.

ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. ერევნისგან განსხვავებით, ბაქოში შეთანხმებას სიხარულით შეხვდნენ.

სამმხრივ დოკუმენტს ხელი სომხეთის პრემიერმინისტრმა, ნიკოლ ფაშინიანმა, აზერბაიჯანის პრეზიდენტმა, ილჰამ ალიევმა და რუსეთის პრეზიდენტმა ვლადიმერ პუტინმა მოაწერეს. შეთანხმების მიხედვით, სომხურმა მხარე, აზერბაიჯანს კონფლიქტის ზონაში რამდენიმე ტერიტორია გადსეცა და კონფლიქტის ხაზის გასწვრივ კი რუსი სამშვიდობოები განლაგდნენ. დროდადრო კი რეგიონში დევნილები დაბრუნდებიან.

ამავე თემაზე: