ქართული ოცნების აღმასრულებელი მდივნის, ირაკლი კობახიძის თქმით, სამართლიანი არჩევნების PVT (ხმების პარალელური დათვლის შედეგები), ობიექტური დამკვირვებლისთვის, ცვლის მოლაპარაკების პროცესს მმართველ პარტიასა და ოპოზიციას შორის.

" [...] ეს, ბუნებრივია, ობიექტური დამკვირვებლისთვის, მოცემულობას ცვლის, მაგრამ, რამდენად არის ობიექტური დამკვირვებელი სააკაშვილი, ბოკერია და გვარამია, ნუ, ამაზე ყველას გაქვთ, ბუნებრივია, თქვენი მოსაზრება. მათთვის თვითმიზანი რადგან არის მოლაპარაკებების ჩაშლა, შეიძლება, მათთვის არც არაფერი შეცვალოს ამ ახალმა ინფორმაციამ. თუ ვინმე არის ობიექტური დამკვირვებელი და თუ ვინმე ჯანსაღად აზროვნებს, როდესაც ხედავს, რომ არჩევნების მაგივრად, სინამდვილეში PVT გაყალბდა, ბუნებრივია, თავისი დასკვნები, ამასთან დაკავშირებით, უნდა გამოიტანოს", — განაცხადა ირაკლი კობახიძემ ქართული ოცნების ოფისში გამართულ ბრიფინგზე.

კობახიძე მბობს, რომ მაშინ, როცა საუბარი იყო არჩევნების გაყალბებაზე, აღმოჩნდა, რომ გვაქვს გაყალბებული PVT.

"საუბარი იყო იმაზე, რომ თითქოს გაყალბდა არჩევნები, ამ დროს აღმოჩნდა, რომ გაყალბდა PVT. ნუ, გაყალბება იყო თუ როგორ იყო, მაგას სჭირდება დამატებითი ჩაღრმავება, მაგრამ, ნაცვლად არჩევნებისა, ჩვენ შედეგად მივიღეთ ყალბი PVT", — განაცხადა ირაკლი კობახიძემ.

ISFED-ის ცნობით, ხმების პარალელური დათვლის პირველადი შიდა აუდიტის შედეგებმა საარჩევნო სუბიექტების მიერ მიღებული ხმების გამოსათვლელ ფორმულაში ხარვეზი გამოავლინა. ამასთან, როგორც ორგანიზაციაში ამბობენ, აუდიტმა PVT-ს მეთოდოლოგიის სიზუსტე და დამკვირვებლების მიერ მოწოდებული ინფორმაციის სანდოობა დაადასტურა.

თავდაპირველად, 31 ოქტომბრის არჩევნების პარალელური დათვლის (PVT) შედეგების მიხედვით, ქართულმა ოცნებამ 45,8% აიღო, ხოლო ნაციონალურმა მოძრაობამ 26,4%. 11 დეკემბერს ISFED-ის მიერ გასწორებული მონაცემების მიხედვით კი, ქართულმა ოცნებამ 47,6%, ხოლო ნაციონალურმა მოძრაობამ 27,4% აიღო, რაც ცდომილების ზღვარის გათვალისწინებით ცესკოს მონაცემებთან უფრო ახლოსაა. ცესკოს დათვლით, ქართულმა ოცნებამ ხმების 48,22%, ნაციონალურმა მოძრაობამ კი — 27,17% მიიღ.

მანამდე ცნობილი გახდა, რომ მმართველი პარტიის წარმომადგენლები ISFED-ს შეხვდნენ. ქართულ ოცნებაში აცხადებდნენ, რომ შეხვედრა ISFED-ის მიერ ჩატარებული პარალელური ხმის დათვლის შედეგებს ეხებოდა და მათ ორგანიზაციას მეთოდოლოგიის შესახებ მონაცემების წარმოდგენა მოსთხოვეს.

ოპოზიციაში მიაჩნიათ, რომ საქმე გვაქვს უკანონო ქმედებებთან. ევროპული საქართველოს ლიდერმა, გიგა ბოკერიამ განაცხადა, რომ, დიდი ალბათობით, ISFED-ის პარალელურ დათვლაში მიღებული ხმების გამოსათვლელ ფორმულაში გამოვლენილი ხარვეზების შესახებ ქართულმა ოცნებამ "უკანონოდ ან მიყურადების" ფორმით იცოდა და ოპოზიციას "მახეს უგებდა". ნაციონალური მოძრაობის წევრს, ხატია დეკანოიძეს მიაჩნია, რომ ეს ფარული მიყურადებისა და დახურულ მონაცემთა ბაზაში შეღწევის ღია მაგალითია.

პარლამენტის თავმჯდომარის, არჩილ თალაკვაძის თქმით, ISFED-ის განცხადების შემდეგ, მთელმა ოპოზიციამ ბოდიში უნდა მოიხადოს.

გაიგეთ მეტი: