ახალგაზრდა მამაკაცი On.ge-სთან საუბარში აცხადებს, რომ ორმა უცნობმა პირმა 18 მაისს, გვიან ღამით, იმის გამო მიაყენა ფიზიკური შეურაცხყოფა, რომ მას საყურე ეკეთა.

მამაკაცის ცემის შესახებ ინფორმაცია ფეისბუკის საშუალებით მისმა მეგობრებმა გაავრცელეს, რის შემდეგაც ჩვენ მას დავუკავშირდით. ის ამ ეტაპზე ვინაობის გამხელისგან თავს იკავებს, რადგან როგორც თვითონ ამბობს, ოჯახის წევრებს უფრთხილდება. როგორც დაზარალებული ამბობს, შემთხვევა რამდენიმე საათის წინ, თემქაზე მოხდა:

ორმა პირმა ჩამიარა, რომლებიც გამომელაპარაკნენ და მითხრეს, რატომ მეკეთა საყურე და ვიყავი თუ არა 17 მაისს ლგბტ პირთა აქციაზე

"მოვდიოდი ჩემთვის. საერთოდ ვატარებ საყურეს, მეცვა წითელი შარვალი. ორმა პირმა ჩამიარა, რომლებიც გამომელაპარაკნენ და მითხრეს, რატომ მეკეთა საყურე და ვიყავი თუ არა 17 მაისს ლგბტ პირთა აქციაზე. ამას მოჰყვა შეურაცხმყოფელი, უხეში შელაპარაკება და ხელით შეხება, მათ მცემეს. პოლიცია არ გამომიძახებია, ჩემი ფეხით მივედი საავადმყოფოში, რადგან მეგონა, ტვინის შერყევა მქონდა".

როგორც ის ამბობს, მას დაზიანებული აქვს კბილი და გარეგნულად ეტყობა ცემის კვალი, სხვა, უფრო მძიმე დაზიანებები ექიმებს არ დაუფიქსირებიათ, რის გამოც ის ახლა სახლში იმყოფება. როგორც მამაკაცი ამბობს, ჯერჯერობით, პოლიციასთან არ უსაუბრია:

"რადგან ვიყავი ნაცემი და იყო კრიმინალური შემთხვევა, თავად ექიმებმა დარეკეს პოლიციაში და მითხრეს, რომ ხვალ, ან ზეგ პოლიციელები მომაკითხავენ. დაველოდები მათ".

On.ge დააკვირდება ამ საქმეს და სიახლეებს პერიოდულად შემოგთავაზებთ.