პარტია მოქალაქეების ლიდერი, ალეკო ელისაშვილი განმარტავს, რომ ის ხვალ პარლამენტში შესვლას არ აპირებს და მისი წინა განცხადებები "ამოჭრეს როგორც უნდოდათ" და "არასწორად თარგმნეს". მისი განმარტებით, პარლამენტში შესვლას არ აპირებს იქამდე, სანამ შეთანხმებას ხელს არ მოაწერენ, რადგან ამ შეთანხმების გადარჩენა უნდა.

ამავდროულად ის ამბობს, რომ როცა შეთანხმების ხელმოწერაზე მოსაზრებები გაააჟღერა, თავზე აიღო "უმძიმესი გადაწყვეტილება" და თქვა სხვების გულისნადები.

"ხვალ არ შევალთ პარლამენტში. ეს ორი დღე ჯვარს მაცვეს, არიქა, ელისაშვილოი თორთლაძეა ფული აიღო და გაიყიდა, იმათ მართლა ფული აიღეს და გაიყიდენ. მე გავბედე და ვთქვი, რაც ყველას გულში უდევს, 99%-ს უნდა პარლამენტში შესვლა. ბოკერია ვერ შედის იმიტომ, რომ მანდატი არ აქვს",— განაცხადა ელისაშვილმა TV პირველის ეთერში.

მანამდე ელისაშვილს ნათქვამი აქვს ისიც, რომ თუ ციხიდან პოლიტპატიმრები არ გამოვლენ, პარლამენტში არ შევა. ამავე დროს, ელისაშვილის განცხადებებიდან ირკვევა, რომ ის პარტიული სიის გაუქმებაზე განცხადებას ხელს არ მოაწერს.

როგორც ელისაშვილი ამბობს, ქართულმა ოცნებამ დაიხია ოთხივე საკითხზე, რომელიც მათ შეხვედრაზე მიიტანეს. ელისაშვილის განმარტებით, როგორც მოთხოვნები ეხება რიგგარეშე არჩევნებს, პოლიტპატიმრების გათავისუფლებასა და საარჩევნო რეფორმას.

ოპოზიციონერი ლიდერი სხვა დეტალებზე არ საუბრობს, თუმცა აღნიშნავს რომ პლებისციტის მოთხოვნას არ ეთანხმება და მას "ხლაპუშკას" უწოდებს.

11 დეკემბერს მეათე მოწვევის პარლამენტის პირველი სხდომის პარალელურად ბარიერგადალახული ოპოზიციური პარტიები, პატრიოტთა ალიანსის გამოკლებით, გეგმავენ ხელი მოაწერონ მემორანდუმს, რომლითაც მანდატებზე უარს იტყვიან.

ორი დღით ადრე პარტია მოქალაქეების ლიდერმა, ალეკო ელისაშვილმა ფეისბუქლაივის დროს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

ამავე თემაზე: