დიდი ბრიტანეთის სამეფო ზარაფხანამ დევიდ ბოუის კარიერის პატივსაცემად მისი სამახსოვრო მონეტა, პირდაპირი მნიშვნელობით, კოსმოსისკენ გაუშვა.

უელსში მდებარე ზარაფხანამ მონეტა ზღვის დონიდან 35 656 მეტრის სიმაღლეზე გაგზავნა და, ამგვარად, თავისი "მუსიკის ლეგენდების" სერიას მესამე წევრი შემატა.

"The Starman-ის", "Life on Mars?-ისა" და "Space Oddity-ს" შემსრულებელი Queen-სა და ელტონ ჯონს შეუერთდა იმ არტისტთა სიაში, რომლის პატივსაცემადაც კოსმოსისკენ მონეტა გაუშვეს.

დევიდ ბოუი, რომელიც ჩვენი ეპოქის ერთ-ერთი ყველაზე გავლენიანი მუსიკოსი იყო, 2016 წელს 69 წლის ასაკში კიბოთი გარდაიცვალა.

ერთი უნციის (28 გრამის) წონის ვერცხლის მონეტა 45 წუთის განმავლობაში "მოგზაურობდა", სანამ საბოლოოდ კვლავ მიწაზე არ დაეშვა, ახლა კი ჯილდოს სახით გაიცემა. არსებობს მონეტის რამდენიმე ვერსია, დაწყებული £5-იანი მონეტით, რომლის ფასიც £13-ია, დამთავრებული £1000-იანით, რომლის ფასიც £72 195-ს შეადგენს.

ფოტო: Royal Mint

სამეფო ზარაფხანას თქმით, მონეტის დიზაინის შთაგონება გახდა ბოუის ბერლინში ცხოვრების დროინდელი ფოტო. მასზე მუსიკოსის მეექვსე სტუდიური ალბომის, Aladdin Sane-ის, საკულტო ელვის ნიშანიცაა გამოსახული.

ზარაფხანას თქმით, "უახლესი ინოვაციური ტექნოლოგიისა და დამზადების ტექნიკების" დამსახურებით, სპეციალური წარმოების მონეტებზე გამოსახული ელვა ბრწყინვალების ეფექტის შესაქმნელად ვარსკვლავური ფერფლით მორთულს ჰგავს.

"ბოუის პირველი ჰიტის, 'Space Oddity-ის', პატივსაცემად ვიფიქრეთ, რომ მისი სახელობის მონეტა კოსმოსში უნდა გაგვეგზავნა და ამ ვარსკვლავური ადამიანისთვის პატივი მისსავე ნოვატორულ სტილში მიგვეგო. დევიდ ბოუის მუსიკა მუსიკოსების თაობები შთააგონა და იმედი გვაქვს, რომ ეს სამახსოვრო მონეტა მთელი მსოფლიოს მასშტაბით მისი ფანებისთვის ძალიან ძვირფასი გახდება", — თქვა ზარაფხანის წარმომადგენელმა კლერ მაკლენანმა.