რამდენიმე კვირის წინ ფეისბუქ ჯგუფში Gen Z გამოცხადდა ესსეების კონკურსი, რომლის მიხედვითაც Gen Z თაობის წარმომადგენლებს უნდა დაეწერათ ესსე სამიდან ერთ–ერთი სათაურით:
1. Gen Z თაობის გამოწვევები
2. ვინ არის Gen Z თაობა და რა გამოარჩევს მას სხვა თაობებისგან?
3. როგორ წარმოგიდგენია საქართველო 2050 წელს?
კონკურსში 18 წლის მარიამ კილასონიამ გაიმარჯვა. მეორე და მესამე ადგილები კი ნინა ჟვანიამ და მალხაზ გაბისონიამ დაიკავეს.
გთავაზობთ მალხაზ გაბისონიას ესსეს რედაქტირებული სახით.

აჰა, გათენდა 2051 წლის 1 იანვარი. თავი მტკივა, გუშინ ბევრი მომივიდა, ამდენი არ უნდა დამელია, მაგრამ ვერ გავუტეხე ჩემი ქვეყნის ყველაზე მნიშვნელოვან, ყველაზე მაგარ ტიპებს, ჩემს თანამოქალაქეებს. აი რაც პრეზიდენტი გავხდი მას მერე ბევრს ვფიქრობ რა შევცვალო, კიდევ რა ტიპის კომფორტი შევუქმნა ადამიანებს ამ ახალ 2051 წელს. მოდი, ყველა ასაკობრივ და სოციალურ სეგმენტს განვიხილავ და ამის მიხედვით გადავწყვეტ კიდევ რისი შეცვლა და გაკეთება შემიძლია.

ბავშვები

ბავშვებს და მათ მშობლებს უკვე აქვთ იმის საშუალება, რომ საბავშვო პროდუქტი უფასოდ მიიღონ, თან – ყველაფერი ხარისხიანია. საბავშვო ბაღებში უკვე არის ტექნიკური ბაზა და აღმზრდელები თუ ფსიქოლოგები აქტიურად არიან ჩართულები მათი, როგორც პიროვნების, ჩამოყალიბების ფორმირებაში. მოკლედ, აქ სრული წესრიგია.

მოსწავლეები

გადავიდეთ სკოლის მოსწავლეებზე. მოსწავლეებს უკვე აქვთ მათთვის საინტერესო საგნების არჩევის უფლება. ყველა სკოლაში არის უფასო კვება, ხარისხიანი პროდუქტი. თითოეულ მოსწავლეზე მუშაობს ფსიქოლოგი და ასაკობრივი პრობლემების დაძლევაში ეხმარება. ასევე, IX კლასის შემდეგ წარმატებულ მოსწავლეებს საზღვარგარეთ განათლების მიღების საშუალება აქვთ. მგონი აქაც წესრიგია.

სტუდენტები

სტუდენტების განვითარების საშუალებები ახლა საკმაოდ მრავალფეროვანი და მასშტაბურია. უკვე ყველა რეგიონშია მაღალი დონის უნივერსიტეტი კვალიფიციური ლექტორებით. თითოეული მათგანი სახელმწიფოსგან აღჭურვილია უახლესი, საჭირო ტექნიკით. და რაც მთავარია, სწავლა უფასოა. მხოლოდ, გამოცდების ფორმატია შეცვლილი: ახლა სტუდენტები უნივერსიტეტებში 3–ეტაპიანი გასაუბრების შედეგად ირიცხებიან. აბა, ჩემს დროს მთელი წელი ვემზადებოდი, 3 საგნის ჩაბარება მომიწია, და თან უნივერსიტეტიც ფასიანი იყო. ვაჰ, როგორ გავიზარდეთ. უი, მთავარი გამომრჩა, ყველა წარმატებული სტუდენტი საქართველოსა თუ მის ფარგლებს გარეთ მაღალი ანაზღაურებით იწყებს მუშაობას. როგორც ჩანს, აქაც ყველაფერი რიგზეა.

ზრდასრულები

კარგი, გადავიდეთ უფროს ასაკობრივ სეგმენტზე. ჩვენს ქვეყანაში, თითოეულ მოქალაქეს აქვს ფულის გამომუშავების საშუალება. ჩემი გაპრეზიდენტებიდან, ქვეყანაში განსაკუთრებული მნიშვნელობა აქვს 2 დღეს, შაბათს და კვირას. რატომ?! ამ დღეებში ნებისმიერ მოქალაქეს აქვს იმის საშუალება, რომ თავის რეგიონში, ქალაქსა თუ სოფელში ონლაინ ჩაეწეროს ჩვენ მიერ შექმნილ პორტალზე www.izrune.ge და განახორციელოს სხვადასხვა ტიპის აქტივობა: დაალაგოს მის რეგიონში დაბინძურებული ადგილები, ჩაატაროს შეხვედრები და ისაუბროს ისეთ საკითხებზე, რაც ცნობიერებას აამაღლებს. ცხადია, სახელმწიფო ამისთვის მათ შესაბამის ანაზღაურებას გადაუხდის.

ასაკოვნები

ჩემი საყვარელი სეგმენტი – ასაკოვანი მოქალაქეები. მახსოვს, 2007 წელი იყო და ბებიაჩემი საფრანგეთში წასვლაზე ოცნებობდა, მაგრამ იმდროინდელი პენსიით აბა როგორ, როცა ბილეთი პენსიაზე 4-5ჯერ ძვირი ღირდა. ნეტა ახლა მყავდეს ბებია გვერდით, პენსიის ნახევარსაც კი არ დახარჯავდა სამოგზაუროდ. თანაც ზემოთხსენებული ონლაინ პლატფორმა ამ სეგმენტისათვისაც ხელმისაწვდომია და არა ერთი პენსიონერი ჩაგვერთო უკვე.

მოწყვლადი ჯგუფები

უმცირებოსებიც კარგად არიან. თითოეული ჯგუფის უფლებების დაცვა სამუშაო გარემოსა თუ მის გარეთ სრულად უზრუნველყოფილია. შარშანწინ კიდევ 3 ტრანსგენდერი და შშმ პირი განათლების და კულტურის სამინისტროში ავიყვანეთ, ზოგი სკოლაში მასწავლებელია, ზოგიც – ლექტორი, ზოგი – ტელეწამყვანი.

რა გამოვიდა, ყველა სეგმენტი საკაიფოდაა; საღოლ მალხაზ, რა საათივით აგიწყვია ეს ქვეყანა.

პირველ ადგილზე გასული ესსე:
Gen Z - ვინ ვართ ჩვენ და რა გამოგვარჩევს სხვა თაობებისგან? – გამარჯვებული ესსე
მეორე ადგილზე გასული ესსე:
Gen Z თაობის გამოწვევები – გამარჯვებული ესსე