K-pop-ის გულშემატკივრებს შეუძლიათ, შვებით ამოისუნთქონ — რამდენიმე წლით მაინც.

პოპულარული სამხრეთკორეული ჯგუფის, BTS-ის ფანები დიდი ხნის განმავლობაში ღელავდნენ, რომ საყვარელი მუსიკალური ბოიბენდის წარმატებისთვის, შესაძლოა, ხელისშემშლელი ყოფილიყო ქვეყანაში მოქმედი კანონი სავალდებულო სამხედრო სამსახურის შესახებ. სამხრეთ კორეაში ყველა შრომისუნარიანი კაცი ვალდებულია, 28 წლამდე საკუთარი ქვეყნის წინაშე ვალდებულება მოიხადოს და 18 თვე იმსახუროს არმიაში.

თუმცა, სამხრეთ კორეის პარლამენტმა კანონში შესატანი ცვლილებების განხილვა დაიწყო, რომელიც პოპვარსკვლავებს — მაგალითად, BTS-ის წევრებს — საშუალებას მისცემს, გადაავადოს ჯარში წასვლა.

აქამდე კანონით გამონაკლისის დაშვება შესაძლებელი იყო მხოლოდ გამორჩეული ხელოვანებისათვის, ათლეტებისა და მუსიკოსებისთვის, მაგალითად, მათთვის, ვინც კლასიკური მუსიკის კონკურსებში იმარჯვებდა, თუმცა, არა — K-pop შემსრულებლებისთვის. ეროვნული კრების განცხადებით, მოსალოდნელი ცვლილება მოიაზრებს განსაკუთრებულ შემთხვევებს მათთვის, ვინც "პოპულარულ კულტურასა და ხელოვნებაში წარმატებას მიაღწია". ჩასწორებული კანონის ამოქმედება საპრეზიდენტო ბრძანებულების საფუძველზე მოხდება უახლოეს პერიოდში.

ფოტო: FLICKR/YUN_Q

BTS-ის ყველაზე უფროსი წევრი, ჯინი, 4 დეკემბერს 28 წლის გახდება. იმის გათვალისწინებით, რომ ცვლილებები კანონში ჯერ არაა განხორციელებული, იგი წლის ბოლომდე უნდა გაიწვიონ. თუმცა თუკი დაგეგმილი კანონპროექტი მალე ამოქმედდება, მას კიდევ ორი წელი მიეცემა სავალდებულო სამხედრო სამსახურის მოსახდელად.

ცვლილების საკითხი დღის წესრიგში მას შემდეგ დადგა, რაც BTS-ის აგვისტოში გამოსული სინგლი, Dynamite, Billboard Hot 100-ის სათავეში მოექცა, რითაც სამხრეთკორეელი პოპშემსრულებლების რეიტინგში პირველ ადგილზე ყოფნის პრეცედენტი შეიქმნა. გასულ თვეში ჯგუფი წარდგენილი იყო გრემის დაჯილდოებაზეც.

ერთ-ერთმა ყველაზე წარმატებულმა K-pop შემსრულებელმა, G-Dragon-მა, 20-თვიანი სამხედრო სავალდებულო სამსახური გასულ წელს დაასრულდა და არმიის სათაო შენობა 3 000 ფანის ყიჟინისა და ზარ-ზეიმის ფონზე დატოვა.