სტუმარ-მასპინძლობის სექტორის წარმომადგენლებმა ბიზნესის გადარჩენისთვის ხუთპუნქტიანი გეგმა პრემიერმინისტრ გიორგი გახარიას ოფიციალურად გაუგზავნეს. რესტორატორებმა მთავრობის ადმინისტრაციის წინ პრესკონფერენცია მოაწყვეს, სადაც დოკუმენტი წაიკითხეს და შემდეგ ის პრემიერის სახელზე კანცელარიაში დაარეგისტრირეს.

როგორც სფეროს წარმომადგენლები აცხადებენ, პანდემიის დროს რესტორნების დახურვა ბიზნესს აზარალებს, მათ უჭირთ საბანკო ვალდებულებების გასტუმრება და გატანის სერვისზეც მუშაობა.

"გატანა არ გაფინანსებს, რომ გადაიხადო ქირის ხარჯი, იჯარის ხარჯი ან ხელფასები. მარტო ის არაა, რომ რესტორნის პატრონი წუხს, რომ რესტორანს ვერ ამუშავებს. არა, ეს არის ის, რომ ანგრევს მთელ რიგ ადამიანებს. დასაქმებულებს, რომლებიც რჩებიან უარაფროდ" — აცხადებს რესტორატორი, ქეთი ბუაძე.

ხუთპუნქტიანი გეგმა მოიცავს როგორც ხელფასების ნაწილის კომპენსაციას, ისე ბანკებთან მთავრობის შუამავლობასა და კომუნალურებზე შეღავათების დაწესებას:

  • სახელმწიფოს მიერ შემდგომი ორთვიანი პერიოდის განმავლობაში ინდუსტრიაში დასაქმებულთა ხელფასის კომპენსაცია 50%-ით;
  • სახელმწიფო გახდეს გარანტი საქართველოში მომუშავე ფინანსურ ინსტიტუტებთან, როგორც სფეროში მომუშავე იურიდიული, ისე ფიზიკური პირებისთვის სესხების გაცემის უზრუნველსაყოფად და ასევე კვების ობიექტებისთვის გრძელვადიანი დაბალპროცენტიანი, ხოლო ლოკდაუნის ორთვიან პერიოდში — ნულპროცენტიანი სესხების გამოსაყოფად, რაც მიემართება თანამშრომლების ხელფასების ასანაზღაურებლად;
  • სტუმარ-მასპინძლობის ინდუსტრიისთვის, ერთი წლის განმავლობაში, შემსუბუქდეს დღგ-ს განაკვეთი;
  • დაწესდეს საშეღავათო პერიოდი სტუმარ-მასპინძლობის სფეროში მომუშავე იურიდიული პირებისთვის ყველა სახის კომუნალურ გადასახადზე;
  • ინდუსტრიას კვლავ მიეცეს საშუალება, ისარგებლოს საშემოსავლო გადასახადის სუბსიდირების პროგრამით, ერთი წლის განმავლობაში.