კომპანია სილქნეტი კატეგორიულად არ ეთანხმება მთავარი პროკურატურის ვებგვერდზე ე.წ. კაბელების საქმის თაობაზე გამოქვეყნებულ განცხადებაში, სილქნეტთან მიმართებაში დასახელებულ ფაქტებს. მათი თქმით, პროკურატურის მიერ გავრცელებული მასალა ისეთ ინფორმაციას შეიცავს, რაც აზიანებს როგორც სილქნეტის იმიჯსა და საქმიან რეპუტაციას, ასევე ბიზნესს ქვეყანაში.

კომპანია თავის განცხადებაში უარყოფს პროკურატურის მიერ გავრცელებულ ინფორმაციას, რომ სილქნეტმა 2 თვით ადრე იცოდა სახელმწიფო შესყიდვის დეტალები, ხოლო სხვა კომპანიებს მხოლოდ 9 დღე ჰქონდათ საკუთარი წინადადებების მოსამზადებლად. კომპანიის განცხადებით, სილქნეტმა, სხვა შესყიდვაში მონაწილე კომპანიების მსგავსად, შესყიდვის დეტალები 2013 წლის 27 აგვისტოს შეიტყო:

"პროკურატურის განცხადების ეს ნაწილი წინააღმდეგობაშია თავად პროკურატურის დასკვნით სიტყვაში მოყვანილ გარემოებებთან, საიდანაც ირკვევა, რომ თბილისი-კოჯორი-ახალციხე-ბათუმის მიმართულებით ოპტიკურ-ბოჭკოვანი კაბელების მიყვანის, ქსელური აპარატურის შეძენისა და მონტაჟის მოთხოვნა, გაჩნდა მხოლოდ 2013 წლის 30 ივლისს. ბუნებრივია, აღნიშნული საჭიროების თაობაზე, მით უფრო, მის დეტალებზე, სილქნეტს ორი თვით ადრე ვერ ეცოდინებოდა".

სილქნეტი ასევე არ ეთანხმება იმას, რომ კომპანიის წინადადება სამინისტროს მოთხოვნებს არ შეესაბამებოდა:

"სახელმწიფო შესყიდვის საგანს წარმოადგენდა თბილისი-კოჯორი-ახალციხე-ბათუმის მიმართულებით ოპტიკურ-ბოჭკოვანი კაბელების მიყვანის, ქსელური აპარატურის შეძენისა და მონტაჟის მომსახურება და არა - მაგისტრალის მშენებლობა. ასევე, სილქნეტი არ იყო სახელმწიფო შესყიდვაში მონაწილე ერთადერთი პირი".

კომპანია განმარტავს, რომ სილქნეტის გარდა, ფასები წარადგინეს შპს დელტაკომმა (10 498 200 ლარი), შპს ოპტიკ-ლაინმა (9 257 750 ლარი) და შპს სპეცკავშირმა (12 886 226 ლარი).

კომპანიის მტკიცებით, მათი წინადადება სრულიად შეესაბამებოდა სამინისტროს მოთხოვნებს:

"სილქნეტმა წარადგინა 1 ძირითადი (მაგისტრალური არხის მშენებლობით) და 3 ალტერნატიული წინადადება. სილქნეტის მიერ წარდგენილი შეთავაზებები სრულად შეესაბამებოდა სამინისტროს მოთხოვნებს, თუმცა ტექნიკური გადაწყვეტის სხვადასხვა ალტერნატივებს გულისხმობდა".

ამას გარდა, სილქნეტი აცხადებს, რომ ამ წინადადების ფასი გაცილებით ნაკლები იყო (5 800 000 – 6 800 000 ლარი, დღგ-ს გარეშე), ვიდრე სხვა მონაწილეების მიერ წარდგენილი ფასები.

კომპანია ასევე უარყოფს პროკურატურის იმ ინფორმაციას, რომ შპს დელტაკომს შეეძლო თავდაცვის სამინისტროსათვის იგივე მომსახურების უფასოდ შეთავაზება:

"თბილისი - კოჯორი - ახალციხე - ბათუმის მიმართულებით შპს დელტაკომს სრულყოფილი საკაბელო ინფრასტრუქტურა არ გააჩნდა, რაც გამორიცხავდა მის მიერ ოპტიკურ-ბოჭკოვანი წვერების სამინისტროსათვის მიწოდების შესაძლებლობას".

სილქნეტი ასევე აღნიშნავს იმასაც, რომ მათ სამინისტროს სიმბოლურ ფასად (თვეში - 1000 ლარი) შესთავაზეს 21 წლის მანძილზე ოპტიკურ-ბოჭკოვანი ინფრასტრუქტურის მომსახურება. მათივე თქმით, აღნიშნული მომსახურების საბაზრო ფასი თვეში დაახლოებით 20 000 ლარია.

კომპანიის განცხადების მიხედვით, ისინი პოლიტიკურ პროცესებს ემიჯნებიან და თანაუგრძნობენ დაკავებულებსა და მათი ოჯახის წევრებს.

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ სცნო და მათ 7-წლიანი პატიმრობა მიუსაჯა. პროკურატურა დაკავებულებს სახელმწიფოს კუთვნილი 4 მილიონის გაფლანგვას ედავება, რასაც ბრალდებულები არ ეთანხმებიან და საქმეს პოლიტიკურად მოტივირებულს უწოდებენ. თავის მხრივ, პროკურატურა მიიჩნევს, რომ სასამართლომ ადეკვატური და მტკიცებულებებზე დამყარებული გადაწყვეტილება მიიღო.