გირჩის ლიდერის ზურაბ ჯაფარიძის თქმით, ქვეყანაში დაწესებულ რეგულაციებს არავინ უნდა დაემორჩილოს, რადგან ორივე მხარეს დგას ადამიანების სიცოცხლე ერთ მხარეს არის კორონავირუსით გარდაცვლილი ადამიანები და მეორე მხარეს შიმშილით. ამიტომ ეს არის ინდივიდუალური პასუხისმგებლობა. ამის შესახებ მან ფორმულას ეთერში ისაუბრა.

"არავინ არ უნდა დაემორჩილოს ამ რეგულაციებს. იმიტომ, რომ გასაგებია რომ კოვიდია გავრცელებული, გასაგებია, რომ ადამიანების გარკვეული ნაწილისთვის, ეს ძალიან მაღალი რისკის მატარებელია და ადამიანები კვდებიან ამისგან, მაგრამ სასწორის მეორე პინაზე, ასევე, დევს ადამიანების სიცოცხლეც და ამ ადამიანებმა რა ქნან? ადამიანები შიმშილისთვის არიან განწირულები. ჩვეულებრივად, იქითაც ადამიანის სიცოცხლეა და აქეთაც. ამიტომაც, ეს არის ადამიანის ინდივიდუალური პასუხისმგებლობის საკითხი", — ამბობს ჯაფარიძე.

დაავადებათა კონტროლის ეროვნული ცენტრის დირექტორის, ამირან გამყრელიძის თქმით, ბოლო 24 საათში გამოვლენილი კორონავირუსის 3 216 ახალი შემთხვევიდან 155 სამედიცინო პერსონალია.

30 ნოემბრის მონაცემებით, ბოლო 24 საათის განმავლობაში კორონავირუსის 3 216 ახალი შემთხვევა დადასტურდა. გამოჯანმრთელდა — 3 937, ხოლო გარდაიცვალა — 37.