დიდი სავაჭრო ცენტრების წარმომადგენლები მთავრობას მიმართავენ, რომ შეზღუდვების დროებითი მოხსნა არა 24 დეკემბრიდან არამედ, 15 დეკემბრიდან დაიწყოს. ამის შესახებ მათ პრესკონფერენციაზე განაცხადეს, სადაც დიდმა სავაჭრო ცენტრებმა თავიანთი შეთავაზებები გააჟღერეს.

მთავრობისა და საკოორდინაციო საბჭოს გადაწყვეტილებით, 28 ნოემბრიდან მასშტაბური შეზღუდვები წესდება, მათ შორის გადაადგილებასა და სავაჭრო ცენტრებზე. ყველა შეზღუდვა დროებით, წინასაახალწლოდ 24 დეკემბრიდან 3 იანვრამდე მოიხსნება.

თბილისი ცენტრალის დირექტორმა, ლევან ყარალაშვილმა განაცხადა, რომ თავიანთი შეთავაზება მათ წერილობით მთავრობას უკვე გაუგზავნეს.

"ეს არის დამატებით ერთი კვირა, რაც საინტერესო და მომგებიანი იქნება ყველასთვის. რადგან, პირველ რიგში, შეამცირებს წნეხს 24 დეკემბრიდან 3 იანვრამდე, როცა მომხმარებლის დიდი მასა იქნება. ამავე დროს, მოგვცემს საშუალებას, რომ იმ ობიექტებმა, რომლებიც ჩვენთან არიან დასაქმებული, ამოყიდონ თავიანთი პროდუქცია და ის მკვდარი სეზონი, რაც იქნება იანვარი-თებერვალი, შეინახონ საკუთარი თავი და დასაქმებული", — განაცხადა თბილისი ცენტრალის დირექტორმა.

გარდა ამისა, იგი ამბობს, რომ უნდა მოიხსნას შეზღუდვა გადაადგილებაზეც, რათა მომხმარებელმა გადაადგილება და სასურველი პროდუქციის შეძენა შეძლოს. ყარალაშვილის თქმით, სავაჭრო ცენტრების სექტორი ასევე მიმართავს მთავრობას, რომ 2020 წლის ქონების გადასახადი მათთვისაც გაუქმდეს.

"ამ შემთხვევაში ყველა ჩვენგანი მზად არის, რომ ის 2 000 ადამიანი, რომელიც ჩვენს სავაჭრო ცენტრებშია დასაქმებული, შეინარჩუნოს მინიმუმ მათი 80 პროცენტი შემდეგი სამი თვის განმავლობაში და არ გაუშვას სახლში. რაც დამატებითი ზეწოლა იქნება ბიუჯეტისთვის, თუ ასე არ მოხდება", — აღნიშნა ყარალაშვილმა.

სავაჭრო ცენტრები მიმართავენ მთავრობას, რომ მათი სესხების რესტრუქტურიზაციის პროცესში დაეხმარონ და ამაში ეროვნული ბანკიც ჩაერთოს:

"თუ არსებობს საშუალება, რომ ვისაუბროთ სუბსიდირებაზე თვითონ საპროცენტო განაკვეთის, რაც მიღებული ფორმა გახდა იმ ვალდებულებებზე, რაც გაგვაჩნია, ესეც იქნება ძალიან კარგი".

გარდა ამისა, ისინი იმედოვნებენ, რომ გაგრძელდება საშემოსავლო გადასახადზე შეღავათიც. როგორც ყარალაშვილი ამბობს, ყველა ეს ღონისძიება სექტორს
"ამოსუნთქვის" საშუალებას მისცემს:

"პანდემიიდან გამომდინარე იანვრის შუა რიცხვებიდან, თუ საჭირო იქნება სრული "ლოქდაუნი", რომელიც გაგრძელდება ოთხი კვირა, ექვსი კვირა, ჩვენ, სავაჭრო ცენტრები მზად ვართ ამ ნაბიჯის გადასადგმელად, თუმცა კრიტიკულია, რომ დეკემბერში ვიმუშაოთ".

საკოორდინაციო საბჭომ 28 ნოემბრიდან 31 იანვრის პერიოდში არაერთი შეზღუდვა დააწესა. მათ შორის, გადაადგილებაზე, მუნიციპალურ და საქალაქთაშორისო ტრანსპორტზე, რესტორნებსა და ბაზრობებზე. 24 დეკემბრიდან 2 იანვრის პერიოდში ხდება შეზღუდვების ნაწილობრივი შემსუბუქება: კერძოდ, ქვეყნის მასშტაბით, იმუშავებენ სავაჭრო ცენტრები, ღია და დახურული ბაზრობები და აღდგება როგორც მუნიციპალური, ისე საქალაქთაშორისო ტრანსპორტის მუშაობა. 3 იანვრიდან 15 იანვრის პერიოდში აღდგება ყველა ის შეზღუდვა, რომელიც 24 დეკემბრამდე მოქმედებდა. ამ პერიოდში ცხადდება უქმე, დასვენების დღეები. ხოლო 16 იანვრიდან აღდგება მუნიციპალური და საქალაქთაშორისო ტრანსპორტის მუშაობა, სავაჭრო ობიექტებისა და ღია და დახურული ბაზრობების მუშაობა (გარდა შაბათ-კვირისა).

ამავე თემაზე: