საქართველოს კონსტიტუციაში შესატანი ცვლილებების, ადამიანის უფლებების და მართლმსაჯულების საკითხებზე მომუშავე ჯგუფი დღეს პირველ სამუშაო შეხვედრას მართავს. სხდომა პარლამენტის თავმჯდომარე ირაკლი კობახიძემ გახსნა.

„წინასწარ უკვე შემოსულია წერილობითი მოსაზრებები და კომისიის ბევრმა წევრმა უკვე წარმოადგინა თავისი წინადადებები, რომელთა განხილვაც დღეს მოხდება. თუმცა შეგვიძლია მხოლოდ ამ მოსაზრებებით არ შემოვიფარგლოთ და ღია დისკუსია გავმართოთ და მუხლობრივად განვიხილოთ საქართველოს კონსტიტუციის შესაბამისი თავები, რაც თითოეულ ჩვენგანს საშუალებას მისცემს საკუთარი შენიშვნები და მოსაზრებები გამოთქვას“, - განაცხადა პარლამენტის თავმჯდომარემ, რომელმაც ჯგუფის წევრებს წარმოდგენილი წინადადებებისთვის მადლობა გადაუხადა.

ადამიანის უფლებების და მართლმსაჯულების საკითხებზე მომუშავე ჯგუფის საქართველოს კონსტიტუციაში შესატან ცვლილებებზე მომუშავე ადამიანების მხოლოდ ერთი ნაწილია. კომისია 4 სამუშაო ჯგუფად არის დაყოფილი და სხვადასხვა მიმართულებით მუშაობენ.

კომისიის შემადგენლობაში ქართული ოცნების, ნაციონალური მოძრაობის, პატრიოტთა ალიანსის, პარლამენტის დამოუკიდებელი დეპუტატი - სალომე ზურაბიშვილი, არასაპარლამენტო ოპოზიციისა და არასამთავრობო ორგანიზაციების წარმომადგენელები არიან.