დაავადებათა კონტროლის ცენტრის (NCDC) ხელმძღვანელის, ამირან გამყრელიძის თქმით, უკეთესი იქნებოდა არჩევნების მეორე ტური არ ყოფილიყო და ასეთ დროს ისინი შეზღუდვებს ნოემბრის დასაწყისშივე მიიღებდნენ. რაც შეეხება შეზღუდვების დაწესების დაგვიანებას, გამყრელიძე ამბობს, რომ ეს რთული კითხვაა.

"სჯობს გვიან, ვიდრე არასდროსო, ხომ არსებობს ასეთი გამოთქმა".

NCDC-ი ხელმძღვანელი აღნიშნავს, რომ პოლიტიკური პროცესი რომ არ ყოფილიყო შეზღუდვები უფრო ადრე დაწესდებოდა, მაგრამ არჩევნების გამო ქვეყანამ სხვა გზა არჩია.

"ამიტომ, რა თქმა უნდა, კი ბატონო, უკეთესი იქნებოდა. ვთქვათ, მეორე ტური რომ არ ყოფილიყო, ეს შეზღუდვები შეიძლება დაწესებულიყო ნოემბრის დასაწყისში და ეფექტს, ალბათ, მეტს მივიღებდით", — განმარტა გამყრელიძემ.

საკოორდინაციო საბჭოს სხდომის შემდეგ ჯანდაცვის მინისტრმა, ეკატერინე ტიკარაძემ განაცხადა, რომ შეზღუდვების ორ ვერსიაზე მსჯელობენ და ამის შესახებ მოსახლეობა 26 ნოემბერს გაიგებს.