წუხელ ბათუმის კოვიდსასტუმროში პაციენტმა ექთანს დაზიანებები მიაყენა. გავრცელებული ინფორმაციით, პაციენტმა თვითდაზიანებებიც მიიყენა.

როგორც იმავე სასტუმროს ექიმი, ეთერ აროშიძე TV პირველთან ამბობს, ექთანს უმნიშვნელო ნაკაწრი აქვს თითის არეში.

"პაციენტი იყოს მეტადონის პროგრამაზე. ჩვეულებრივად, თუკი მეტადონის მიტანა დაუგვიანდებოდა, შესაძლოა, რაღაც ფორმით გამოეხატა. ვერ გეტყვით, რა მოხდა. შესაძლოა, რამე აგრესია გამოავლინა", — განაცხადა ეთერ აროშიძემ.

აღნიშნულ ფაქტთან დაკავშირებით ჯანდაცვის მინისტრმა, ეკატერინე ტიკარაძემ განაცხადა, რომ სამედიცინო პერსონალის უსაფრთხოების მიზნით გარკვეული ზომები უკვე მიღებულია და დამატებით ზომებზე მსჯელობა მიმდინარეობს.

"დაცვის სამსახური არის ყველა სასტუმროში, თუმცა, რა თქმა უნდა, ინციდენტებისგან დაზღვეული არა ვართ, ჩვენ ვცდილობთ, რომ სამედიცინო პერსონალის უსაფრთხოება უზრუნველვყოთ. გარკვეული ზომები არის მიღებული და დამატებით ზომებზე მიმდინარეობს მსჯელობა", — განაცხადა ეკატერინე ტიკარაძემ.

შინაგან საქმეთა სამინიტროს ინფორმაციით, საქმეზე გამოძიება საქართველოს სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.