გუშინ, 24 ნოემბერს ცნობილი ამერიკული მუსიკალური დაჯილდოების, გრემის 2021 წლის ნომინაციების სია გამოქვეყნდა და პოპულარულმა მომღერალმა ჯასტინ ბიბერმა ოთხი ნომინაცია მიიღო, თუმცა, ამის მიუხედავად, ეს კანდელი მომღერალი, ცოტა არ იყოს, მაინც ნაწყენია.

ბიბერის გასული წლის შემოქმედება პოპის ჟანრის ნომინაციებშია წარდგენილი, თუმცა თავად მომღერალი მიიჩნევს, რომ ეს არასწორია: ინსტაგრამის პირად გვერდზე გამოქვეყნებული პოსტით ამტკიცებს, რომ ის R&B-ის კატეგორიაში უნდა იყოს წარდგენილი და არა — პოპის.

"Changes (ცვლილებები) იყო და არის R&B ალბომი. რატომღაც გრემის ჟიურის წევრებმა ასე არ მიიჩნიეს, რაც ჩემთვის ძალიან უცნაურია. R&B ჟანრის მუსიკის გაღმერთებით გავიზარდე და ყოველთვის ვოცნებობდი, რომ მსგავსი რამ შემქმნა. ახლა კი მოულოდნელად ჩემს ალბომს შესაფერის კატეგორიაში არ განიხილავენ, რაც მეტისმეტად უსიამოვნოა. იმ მელოდიისა და ვოკალური სტილის გათვალისწინებით, რომელიც ალბომის შექმნისას გამოვიყენე, ის უეჭველად R&B ჟანრს განეკუთვნება", — წერს 26 წლის ბიბერი.

მართალია, ჯასტინ ბიბერი დარდობს, რომ იმ კატეგორიაში არ განიხილავენ მის შემოქმედებას, რომელიც თავად წარმოედგინა, თუმცა მელომანების დიდი ნაწილი უფრო იმ ფაქტითაა გაკვირვებული, რომ ისეთი მნიშვნელოვანი თანამედროვე მუსიკოსი, როგორიცაა The Weeknd, საერთოდ ვერ მოხვდა ნომინანტებს შორის.

ამ ფაქტს თავად The Weeknd-იც გამოეხმაურა და გრემის დაჯილდოება კორუფციაში დაადანაშაულა.

რაც შეეხება ჯასტინ ბიბერს, შეგიძლიათ მოუსმინოთ მის ყველაზე ცნობილ სინგლს თავისი ალბომიდან Changes და თავად შეაფასოთ, იმსახურებდა თუ არა ის R&B ალბომის ნომინაციას, ან საერთოდ იმსახურებდა თუ არა რამეს...