2018 წელს საქვეყნო ცნობადობის მოპოვების შემდეგ ავსტრალიის ზოოპარკის გეი პინგვინების წყვილს ახლა მეორე წიწილა შეეძინა.

სპენისა და მეჯიქის სურვილი, მშობლები გამხდარიყვნენ, სიდნეის ზოოპარკის მომვლელებმა პირველად მაშინ შეამჩნიეს, როცა შეჯვარების სეზონის დროს მათ ბუდის მოწყობა დაიწყეს.

სამწუხაროდ, ბიოლოგია არ იძლეოდა იმის საშუალებას, რომ მათ შვილი ჰყოლოდათ, ამიტომაც თანამშრომლებმა წყვილს სათამაშო კვერცხი მისცა, რომ შეემოწმებინათ, რამდენად სურდათ გეი პინგვინებს შვილზე ზრუნვა. როდესაც პინგვინებმა დაამტკიცეს, რომ კარგი მშობლები იქნებოდნენ, აკვარიუმის თანამშრომლებმა სათამაშო კვერცხი ნამდვილი, უპატრონოდ დატოვებული კვერცხით შეუცვალეს.

სპენი და მეჯიქი ძალიან ზრუნავდნენ თავიანთ კვერცხზე და 2018 წლის ოქტომბერში პირველი წიწილა, ლარა, შეეძინათ. მას შემდეგ ორი წელი გავიდა და ამ ბედნიერ ოჯახს კიდევ ერთი ახალი წევრი შეემატა. შეჯვარების ბოლო სეზონის დროს წყვილი კიდევ ერთ მიტოვებულ კვერცხზე ზრუნავდა და მათი წიწილა წინა თვეში აკვარიუმის სუბანტარქტიკულ ზონაში გამოჩეკილი ჯენტუს პინგვინების ნაშიერებიდან ერთ-ერთია.

Sea Life-ის წარმომადგენელმა სიდნეის Star Observer-თან ინტერვიუში განაცხადა, რომ პინგვინები ზოგჯერ ზედმეტად ბევრ კვერცხს დებენ ან საკმარისად დიდ ყურადღებას ვერ უთმობენ თითოეულ მათგანს.

როცა ასე ხდება, თანამშრომლები ზოგჯერ "ამ კვერცხებს აღსაზრდელად სხვა, მაგალითად, სპენისა და მეჯიქისნაირ, წყვილებს აძლევენ". წარმომადგენელმა განმარტა, რომ, როგორც წარსულის გამოცდილებიდან ჩანს, ერთნაირსქესიანი წყვილები კარგი მშობლები არიან ხოლმე, ამიტომაც აკვარიუმის თანამშრომლებმა გადაწყვიტე, მათთვის კიდევ ერთი კვერცხი მიენდოთ.

სიდნეის აკვარიუმის პინგვინების ზედამხედველმა კერი დიქსონმა ზოოპარკის ახალწვეულებზე ისაუბრა და განაცხადა:

"ძალიან გვიხარია, რომ შეგვიძლია, ჩვენს კოლონიაში ახალშობილ პინგვინებს მივესალმოთ. ისინი ძალიან კარგად გრძნობენ თავს და წონაში იმატებენ. თავიდან დაახლოებით 95 გრამი იყვნენ, ახლა კი ყველაზე უფროსი თითქმის 2 კგ-ია, ყველაზე პატარა კი — 399 გრამი".

მან განმარტა, რომ პინგვინების იმ მრავალი სახეობიდან ერთ-ერთი არიან, რომლებშიც ერთნაირსქესიანი ურთიერთობები არსებობს:

"გაგვიმართლა, რომ [სიდნეის აკვარიუმში] საკუთარი მამრების წყვილი გვყავს. ჯენტუს პინგვინების სხვა მშობლების მსგავსად, სპენი და მეჯიქიც ძალიან ყურადღებიანები და მზრუნველები არიან და გვაქვს იმის პატივი, რომ ეს გასაოცარი წყვილი ჩვენს კოლონიაში იყოს".

სპენისა და მეჯიქის ორი წლის ლანა მშობლებთან ძალიან კარგად გრძნობს თავს და ის თანამშრომლებს "ყოველდღიურად აკვირვებს იმით, თუ რამდენად დამოუკიდებელია". წლევანდელ შეჯვარების სეზონზე მან მეწყვილესთან ერთად ბუდის მოწყობაში მონაწილეობა სცადა, თუმცა, სამწუხაროდ, წყვილმა კვერცხის გამოჩეკა წარმატებით ვერ მოახერხა.

დიდი ალბათობით, ლანა ამას მომავალ წელსაც ცდის და ზოოპარკის თანამშრომლები მოუთმენლად ელიან, თავად იხილონ, შეეძინებათ თუ არა სპენსა და მეჯიქს "პატარა შვილიშვილი წიწილა".

ამავე თემაზე:

• ნიდერლანდების ზოოპარკში გეი პინგვინებმა ლესბოსელების წყვილს კვერცხები მოპარეს;
• ავსტრალიაში გეი პინგვინების წყვილმა კვერცხი იშვილა;
• გეი პინგვინები, რომლებმაც წიწილა იშვილეს, ლონდონის ზოოპარკში პრაიდს მოაწყობენ;
• ესპანეთში გეი პინგვინების წყვილს შვილი ეყოლა.