ლეიბორისტების ლიდერის შალვა ნათელაშვილის თქმით, კონსულტაციები მხოლოდ იმ თემაზე შედგება, რომ დაიგეგმოს ახალი არჩევნები. მან ასევე აღნიშნა, რომ ივანიშვილისგან არჩევნების ახალ თარიღს ელოდება. ამის შესახებ ნათელაშვილმა აშშ-ის ელჩთან შეხვედრის წინ განაცხადა.

"ჩვენ დეკლარაციაზე გვაქვს ხელი მოწერილი, რომ ამ გზით, ამ შეთითხნილ პარლამენტში არ შევალთ. ვითხოვთ ხელახალ არჩევნებს. ივანიშვილისგან ველოდებით არჩევნების ახალ თარიღს და მხოლოდ ამ თემაზე შეიძლება იყოს კონსულტაციები", — განაცხადა შალვა ნათელაშვილმა.

დღეს ოპოზიციური პარტიები აშშ-ის ელჩს კიდევ ერთხელ ინდივიდუალურად ხვდებიან.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. მათ ბოიკოტი გამოუცხადეს არჩევნების მეორე ტურსაც, რომელიც 17 მაჟორიტარულ ოლქში შედგა. ოპოზიცია ითხოვს ხელახალი საპარლამენტო არჩევნების ჩატარებას ახალი საარჩევნო ადმინისტრაციის პირობებში.

აშშ-ის და ევროკავშირის საელჩო ოპოზიციას მოუწოდებენ, პარლამენტში შევიდნენ, ვინაიდან მათთვის ერთპარტიული პარლამენტია მიუღებელი.