ამერიკის სახელმწიფო მდივანს, მაიკ პომპეოს განცხადებით, თბილისსა და იერუსალიმში ვიზიტისას მან ამერიკის შეერთებული შტატების ურყევი მხარდაჭერა დააფიქსირა საქართველოსა და ისრაელის უსაფრთხოებისა და სუვერენიტეტის მიმართ.

"მოხარული დავრჩი ჩემი პროდუქტიული ვიზიტით ამ კვირაში თბილისსა და იერუსალიმში. დავადასტურე აშშ-ს ურყევი მხარდაჭერა ჩვენი მოკავშირეების, საქართველოსა და ისრაელის უსაფრთხოებისა და სუვერენიტეტის მიმართ", — წერს პომპეო ტვიტერზე.

პომპეო თბილისში 17 ნოემბერს საღამოს ჩამოფრინდა და ოფიციალური შეხვედრები 18 ნოემბერს ჰქონდა. ის თბილისში 24 საათზე ნაკლები იყო.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, თუმცა მედიასთან კომენტარები არ გაუკეთებია და მხოლოდ აშშ-ის საელჩოს განცხადებები გავრცელდა. ასევე, პომპეო შეხვდა არასამთავრობო ორგანიზაციებს. ცნობილია, რომ NGO-ებთან საუბრის ძირითადი თემა სასამართლოს დამოუკიდებლობა იყო.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. ვიზიტის დასრულების შემდეგ პომპეომ თავისი წარმომადგენელი დატოვა, რომელიც ოპოზიციის წევრებს შეხვდა.

გაიგეთ მეტი პომპეოს ვიზიტზე: