პარტია ლელოს ლიდერის, ბადრი ჯაფარიძის თქმით, აუცილებელია, რომ ყველამ, მათ შორის, ქართულმა ოცნებამაც ერთად უნდა იმუშავონ, რომ არსებული პოლიტიკური კრიზისიდან გამოვიდნენ. მისი თქმით, ფასილიტატორები ამ შეხვედრებით სწორედ გამოსავალს ეძებენ.

"ჩვენი პოზიცია არ დაგვიმალავს, მივიჩნევთ, რომ არჩევნები გაყალბდა და ჩემი ღრმა რწმენით, ერთადერთი გამოსავალია ახალ არჩევნებთან დაკავშირებით შეთანხმება. რა თქმა უნდა, ქართულ ოცნებას უნდა ესმოდეს, რომ დაპირისპირება და ოპოზიციის უგულებელყოფა აღრმავებს კრიზისს. შეთანხმება არ იქნება ერთ-ერთი მხარის დამარცხება, ეს იქნება, ხალხის ინტერესებისა და ჩვენი ქვეყნის გამარჯვება", — განაცხადა ჯაფარიძემ.

იგი იმედს გამოთქვამს, რომ ქართული ოცნება პასუხისმგებლობით მიუდგება ამ რთულ ვითარებას და გამოსავალს ერთად მოძებნიან. ჯაფარიძის განცხადებით, ცივილიზებულ საზოგადოებაში ერთადერთი გამოსავალი ახალ არჩევნებზე შეთანხმებაა.

არჩევნების მეორე ტურამდე ერთი დღით ადრე ელჩებმა ოპოზიციის წარმომადგენლებთან ინდივიდუალური შეხვედრების გამართვა დაიწყეს. მანამდე ელჩები პოლიტიკურ პარტიებთან საერთო შეხვედრებს აწყობდნენ.

არჩევნებთან დაკავშირებით პოლიტიკური პარტიების ლიდერები აშშ-სა და ევროკავშირის ელჩებს რამდენჯერმე შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრის დეტალებზე პოლიტიკოსები არ საუბრობენ, თუმცა აღნიშნავენ, რომ მხარეების პოზიციები უცვლელია.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.