ლეიბორისტული პარტიის ლიდერმა, შალვა ნათელაშვილმა განაცხადა, რომ მესამე რაუნდისთვის მოსამზადებელი სამუშაოები მიმდინარეობს და ერთი-ერთზე შეხვედრების ამის წინაპირობაც არის. ამის შესახებ მან ელჩებთან შეხვედრის შემდეგ განაცხადა.

"საუბრის შინაარსის გატანა დიპლომატიური პროტოკოლებით არის დაუშვებელი და შეუძლებელი. მაგრამ ზოგადი პრინციპები რის თაობაზეც მიდის ვნებათა ღელვა და მათ შორის ეს დიპლომატიური მოლაპარაკებები ცნობილია და საიდუმლო არაფერია. ჩვენი პოზიცია ცხადია. ოპოზიცია აცხადებს, რომ ეს პარლამენტი არ უნდა შედგეს", — განაცხადა შალვა ნათელაშვილმა.

მისივე თქმით, კონსულტაციების ფორმატი ითვალისწინებს როგორც ცალ-ცალკე შეხვედრებს, ისე კოლექტიურ ფორმატსაც და რომელს აირჩევენ მასპინძლები, მათი გადასაწყვეტია.

"ელჩებს ჩვენ ვხვდებით არა იმიტომ, რომ დათმობაზე წაგვიყვანოს ვინმემ, ამას არც იკადრებს არც ერთი ელჩი და ჩვენც ვხელმძღვანელობთ ჩვენი ქვეყნის ინტერესებიდან, ხალხის დავალებებიდან გამომდინარე", — აღნიშნა ნათელაშვილმა.

არჩევნების მეორე ტურამდე ერთი დღით ადრე ელჩებმა ოპოზიციის წარმომადგენლებთან ინდივიდუალური შეხვედრების გამართვა დაიწყეს. მანამდე ელჩები პოლიტიკურ პარტიებთან საერთო შეხვედრებს მართავდნენ.

არჩევნებთან დაკავშირებით პოლიტიკური პარტიების ლიდერები აშშ-სა და ევროკავშირის ელჩებს რამდენჯერმე შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრის დეტალებზე პოლიტიკოსები არ საუბრობენ, თუმცა აღნიშნავენ, რომ მხარეების პოზიციები უცვლელია.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.