ერთიანი ნაციონალური მოძრაობის ერთ-ერთი ლიდერი, ნიკა მელია აცხადებს, რომ კობიაშვილის განცხადება მისი დაწერილი არ იყო, რადგან მას ამის დაწერის "უნარი არ შესწევს".

"კობიაშვილის განცხადება იყო სამარცხვინო ჩემთვის. რატომ, იცით?! ცხოვრებაში ვერ დაწერს ამ განცხადებას. ვერასდროს ვერ დაწერს ამ განცხადებას, 10 აკადემია რომ დაამთავროს, ადამიანს ეტყობა, რომ ამის დამწერი არ არის. თავს მოვიჭრი, რომ ბატონ კობიაშვილს არ შესწევს უნარი, ერთი აბზაცის დაწერისაც კი, რაც განცხადების სახით გავრცელდა", — ამბობს მელია.

ქართული ოცნების გლდანის მაჟორიტარობის კანდიდატმა, ლევან კობიაშვილმა გუშინ განცხადება გაავრცელა, სადაც ამბობდა, რომ მელიამ უნდა დაასაბუთოს, რის საფუძველზე სდებს ბრალს ოფისის დარბევაში და კრიმინალთან კავშირში, ან მოუწევს ცილისწამებაზე ბოდიში მოიხადოს.

დღეს ერთიანი ნაციონალური მოძრაობის ინფორმაციით, გლდანში ნიკა მელიას შტაბზე თავდასხმა მოხდა. როგორც On.ge-ს მელიას შტაბის წევრმა განუცხადა, ოფისს ქვები და, სავარაუდოდ, ე.წ მოლოტოვის კოქტეილები ესროლეს. დამწვარია ოფისის ავეჯი.