ცენტრალური საარჩევნო კომისია აცხადებს, რომ სოციალურ ქსელში თამარ ჟვანიას ყალბი ანგარიში შეიქმნა, რისი მიზანიც საზოგადოების შეცდომაში შეყვანაა.

"ყალბი ანგარიშის რეალური მფლობელები საზოგადოების შეცდომაში შეყვანას ცდილობენ. ისინი სხვადასხვა პოლიტიკური ძალების წარმომადგენლების მიერ ფეისბუქზე გამოქვეყნებულ პოსტებზე კომენტარებს თამარ ჟვანიას სახელით წერენ", — ვკითხულობთ განცხადებაში.

ცესკოს ინფორმაციით, ყალბი ანგარში რამდენიმე დღის წინ შეიქმნა.

"გვინდა განვაცხადოთ, რომ აღნიშნული ფაქტი ცესკოს თავმჯდომარის სახელის არაკეთილსინდისიერი გამოყენების მორიგი შემთხვევაა და წარმოადგენს იმ დამაზიანებელი კამპანიის შემადგენელ ნაწილს, რომელიც საარჩევნო ადმინისტრაციის მიმართ ხორციელდება", — აცხადებენ ცესკოში.

ცესკოს განმარტებით, თამარ ჟვანიას აქვს ფეისბუქის ოფიციალური, ვერიფიცირებული გვერდი, რომელსაც თან ერთვის შესაბამისი აღნიშვნა.