იუსტიციის ყოფილი მინისტრი და ქართული ოცნების სიის მეოთხე ნომერი, თეა წულუკიანი ამ ამბობს, რომ ოპოზიციას ხმების გადათვლა არ უნდა, მათ სურთ რევოლუცია, რომელიც უკვე ჩაფლავდა. ამის შესახებ მან იმედის ეთერში ისაუბრა.

"მათ უყვართ ეს სიტყვა [რევოლუცია] და მეც შემიყვარდა. ახლა ამ ჩაფლავებული რევოლუციის ნანგრევებზე ჩვენ ვხედავთ, რომ აღმოცენების პროცესშია პოლიტიკური ექსტრემიზმი. ამიტომ ჩვენ არ ვაპირებთ, დავუთმოთ პოლიტიკურ ექსტრემიზმს. კონსტრუქციული დიალოგისთვის, რა თქმა უნდა, კარი რჩება ღია", — განაცხადა წულუკიანმა.

მისივე თქმით, ისინი არ აპირებს ოპოზიციის პარლამენტში შესვლის სანაცვლოდ, მათ ხმები დაუთმონ. როგორც წულუკიანი განმარტავს, პოლიტიკური ექსტრემიზმია, როცა მოლაპარაკებებში არაფერს თანხმდებიან, გარდა ხელახალი არჩევნებისა.

ქართული ოცნების გენერალურმა მდივანმა, კახა კალაძემ განაცხადა, რომ მმართველ პარტიაში ხელახალი არჩევნების ჩატარების საკითხი არც განიხილება. მისივე თქმით, აშშ-ს ელჩთან მოლაპარაკებების დროს ოპოზიციამ უარი თქვა ხმების გადათვლაზე და ვიდეოჩანაწერების შემოწმებაზე, რომელიც ე.წ. კარუსელების შესახებ სპეკულაციებს გააქრობდა. მსგავსი შინაარსის განცხადება მმართველი გუნდის წევრმა, მამუკა მდინარაძემაც გააკეთა.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

ამასთან, ოპოზიციის წარმომადგენლების თქმით, ხმების გადათვლას აზრი დაკარგული აქვს, რადგან ცენტრალურ საარჩევნო კომისიაში ოქმები დაჩქარებით შეაჯამეს და გადაწყვეტილება მიიღეს.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. შეხვედრები აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრება.