თბილისის მერიის ინფორმაციით, მეტროსადგურ ახმეტელის თეატრის შესასვლელში რიგი ღია სივრცეში შეკავდა, ხოლო მეტროს ვესტიბიულში იყო სიხალვათე.

თბილისის მერია გამოეხმაურა დღეს, პიკის საათის პერიოდში, მეტროსადგურ ახმეტელის თეატრის შესასვლელთან მგზავრთა ნაკადის შესახებ გავრცელებულ ინფორმაციას.

მათი თქმით, კიდევ ერთხელ შევახსენებთ საზოგადოებას, მაშინ, როდესაც ქვეყანაში მძიმე ეპიდემიოლოგიური სიტუაციაა და ცენტრალური ხელისუფლების მხრიდან ყოველდღიურად ხდება ვირუსის გავრცელების წინააღმდეგ განსაკუთრებული ღონისძიებების გატარება, რასაკვირველია, თბილისის მუნიციპალიტეტი, საკოორდინაციო საბჭოსთან შეთანხმებით, შესაბამის ზომებს მიმართავს.

მერიის ინფორმაციით, ერთ-ერთი ასეთი ღონისძიებაა მეტროპოლიტენში მგზავრთა ნაკადების მართვა. მართვის შედეგად ხდება მეტროსადგურების შიგნით მგზავრთა ნაკადის განტვირთვა და რიგის მართვა გარეთ, ღია სივრცეში. შედეგად, ქვედა ვესტიბიულებში ნაკადი იკლებს და მცირდება ვირუსის გავრცელების რისკი.

6 ნოემბრიდან, ვარკეთილის, ახმეტელის თეატრის, დიდუბისა და სადგურის მოედნის მეტროსადგურებზე პიკის საათებში მგზავრთა ნაკადის კონტროლი დაიწყო. ინფორმაცია ამის შესახებ თბილისის მერიამ გაავრცელა.