თბილისი მერი კახა კალაძე აცხადებს, რომ ფეხბურთის გულშემატკივრის დაჯარიმებამ საზოგადოების გულწრფელი აღშფოთება გამოიწვია და საკუთარი ქვეყნისა და ნაკრების გულშემატკივრობა დაფასებას იმსახურებს. ის პირობას დებს, რომ ამ ადამიანს პრობლემა არ შეექმნება და კანონის მოთხოვნების დაცვით გადაჭრიან პრობლემას.

"გუშინდელმა დღემ გული დაწყვიტა ჩვენი ნაკრების ყველა გულშემატკივარს, რომლებიც ფეხბურთის და ჩვენი ქვეყნის სიყვარულმა, ჩვენი გამარჯვების ჟინმა გააერთიანა. გუშინ ბევრი მათგანის თვალზე ვიხილეთ ცრემლი და ეს ემოცია ყველაზე დიდ დაფასებას იმსახურებს.

გუშინ, ერთ-ერთი ასეთი გულანთებული ადამიანი საკანონმდებლო რეგულაციების საფუძველზე დაჯარიმდა, რამაც ადამიანების გულწრფელი აღშფოთება გამოიწვია.

ფეხბურთის და საკუთარი ქვეყნის ნაკრების ასეთი გულშემატკივრობა, დაფასებას იმსახურებს და ჩემი აზრით, ჯარიმა ამ ადამიანის ოჯახს ტვირთად არ უნდა დააწვეს. ამიტომ პირობას ვიძლევი, ამ ადამიანს პრობლემა არ შეექმნება და კანონის მოთხოვნების სრული დაცვით შევძლებთ ამ პრობლემის გადაჭრას", — წერს ის ფეისბუქგვერდზე.

მთავრობის გადაწყვეტილების გამო, გუშინდელ მატჩს გულშემატკივარი ვერ დაესწრო და მათი ნაწილი მოედნის გარეთ იყო შეკრებილი. მატშის შემდეგ ერთ-ერთი გულშემატკივარი 2 000 ლარით დააჯარიმეს გადაადგილების შეზღუდვის დარღვევის გამო. თუმცა, ეს პირველი შემთხვევა არ არის, როდესაც რეგულაციის დამრღვევებს აჯარიმებენ. ამდენინვე ოდენობის ჯარიმა გამოუწერს აქციის არაერთ მონაწილეს, რომელიც არჩევნების შედეგებსა და მთავრობის რეგულაციებს აპროტესტებდა.