ფედერაციის გენერალური მდივანი, დავით მუჯირი ჟურნალისტებს აკრიტიკებს იმის გამო, რომ გუშინდელ მატჩზე კახა კალაძის, მისი შვილისა და ირაკლი კობახიძის დასწრებაზე სვამენ კითხვებს. მისი აზრით, ეს არ არის პრიორიტეტული კითხვა და დღეს არ იგრძნობა ჟურნალისტებისგან გუნდისადმი მხარდაჭერა.

"ის მხარდაჭერა, რომელიც თქვენი ვალდებულებაა, ის მხარდაჭერა, რომელიც ქართველი ხალხის ვალდებულებაა, სამწუხაროდ, დღეს არ იგრძნობა. შეიძლება ესეც იყოს ერთ-ერთი ფაქტორი, რომ ჩვენ ჯერ ევროპის ჩემპიონატზე... არ ვართ, ალბათ, ქვეყანა მზად რომ წარმოვადგინოთ", — განაცხადა ფედერაციის გენერალურმა მდივანმა.

მისი თქმით, სამწუხაროა ისიც, როცა ნაკრები ასე ახლოს მივიდა ოცნების ასრულებასთან და მათ არ უჭერენ მხარს.

"ძალიან სამწუხაროა, როცა შეკითხვებს იწყებთ იქიდან, საიდანაც მართლა პრიორიტეტული არ არის დღეს. ლეგიტიმური არის, მაგრამ პრიორიტეტული არ არის. ლეგიტიმურსა და პრიორიტეტულს შორის ძალიან დიდი სხვაობაა ჩემთვის. ლეგიტიმური კითხვა შეგიძლიათ დასვათ, ყველა კითხვაზე გაგეცით პასუხი, მზად ვარ კიდევ, რომ თქვენს კითხვასაც ვუპასუხო. თუმცა სამწუხაროა-თქო ვიძახი, ჩემს აზრს გამოვთქვამ, რომ ლეგიტიმური კითხვა უფრო მნიშვნელოვანია, ვიდრე ნაკრების წარუმატებელი თამაში", — განაცხადა მან.

ფეხბურთის ფედერაციის განცხადებით, საქართველო-მაკედონიის მატჩზე დასწრება სამთავრობო გუნდიდან ბევრს წევრს სურდა, თუმცა ვერ მოხერხდა და სამწუხაროა, რომ თბილისის მერს, კახა კალაძეს მხოლოდ სამი საშვი ჰქონდა.

"სამწუხაროა, რომ მხოლოდ სამი საშვი გადაეცა ბატონ კახის, ქალაქის ხელმძღვანელობას და მთვრობის წარმომადგენლებს. ერთადერთი მთავრობის წარმომადგენელი იყო — სპორტის მინისტრის მოადგილე, შალვა გოგოლაძე. სამწუხაროდ, სხვების დაპატიჟება... მრავალი მსურველი იყო სამთავრობო სექტორიდან, რომ ამ თამაშზე გუნდთან ერთად ყოფილიყო, ისევე, როგორც მრავალი გულშემატკივარი", — განაცხადა მუჯირმა.

მანვე აღნიშნა, რომ კალაძის მატჩზე დასწრება წინასწარ იყო შეთანხმებული უეფასთან.

საქართველო-მაკედონიის მატჩს გულშემატკივარი ვერა, მაგრამ თბილისის მერი და გენერალური მდივანი კახა კალაძე შვილთან ერთად დაესწრო. პირველი არხის პირდაპირი ეთერის კადრებში ჩანს, რომ მატჩზე იყო ქართული ოცნების აღმასრულებელი მდივანი ირაკლი კობახიძე, ფედერაციის პრეზიდენტი და ამავე პარტიის წევრი ლევან კობიაშვილი და სხვა პირებიც.

პარალელურად გულშემატკივარი მატჩს გარეთ დამონტაჟებულ ეკრანზე უყურებდა. ზოგიერთ მათგანი გადაადგილების შეზღუდვის წესის დარღვევისთვის 2 000-ლარით დააჯარიმეს.

მიუხედავად იმისა, რომ UEFA-მ თამაშებზე მაყურებლის ნაწილის მისვლა სპეციალური წესების დაცვით დაუშვა, საკოორდინაციო საბჭომ, კორონავირუსის გავრცელების მიზეზით, უარი თქვა. ამ მიზეზის გამო, წინა მატჩზეც გულშემატკივრები სტადიონის გარეთ იყვნენ შეკრებილები.