საქართველოს საპატრიარქოს განცხადებით, ეპიდემიის მკვეთრი გავრცელების გამო, ხვალ, 13 ნოემბერს მრევლის მსვლელობა აღარ გაიმართება. 13 ნოემბერს ჯალალ ედ-დინის დროს წამებულ 100 000 ქართველთა ხსენების დღეა.

"ამ დღეს ტრადიციულად ეწყობოდა ხალხმრავალი მსვლელობა, რომელიც მეტეხის ხიდზე სრულდებოდა პარაკლისით, სხვადასხვა საზეიმო ღონისძიებითა და წყალზე ყვავილების მოფენით. თუმცა, ეპიდემიის მკვეთრი გავრცელების გამო წელს მრევლის მსვლელობა აღარ გაიმართება", — წერია საპატრიარქოს მიერ გავრცელებულ განცხადებაში.

მათივე თქმით, 17:00 საათზე მხოლოდ მცირე პარაკლისი ჩატარდება და ყვავილების გვირგვინით ანთებულ სანთლებს მტკვარში ჩაუშვებენ.

თავიდან საპატრიარქო კორონავირუსის გამო შემოღებულ შეზღუდვების დაცვაზე უარს ამბობდა. მაშინ, როცა დაავადებათა კონტროლის ეროვნული ცენტრის ხელმძღვანელები მრევლს სააღდგომოდ ეკლესიაში მისვლისგან თავის შეკავებისკენ მოუწოდებდნენ, ეკლესიების ნაწილში წირვა-ლოცვა მაინც ჩატარდა.

ხელისუფლებისა და საპატრიარქოს შეთანხმების მიხედვით, მსურველები ეკლესიებში 21:00 საათამდე უნდა მისულიყვნენ და 06:00 საათამდე უნდა დარჩენილიყვნენ.

12 ნოემბრის მონაცემებით, საქართველოში კორონავირუსის 3 120 ახალი შემთხვევა გამოვლინდა. ამასთან, გამოჯანმრთელდა 2 358 პირი, გარდაიცვალა — 33.