ევანგელურ-ბაპტისტური ეკლესიის ეპისკოპოსი, რუსუდან გოცირიძე და აქტივისტი გოგი ხოჭოლავა 2 000-2 000 ლარით დააჯარიმეს. როგორც ისინი TV პირველთან ჰყვებიან, ორივე მათგანი ტელეკომპანიის გადაცემაში სტუმრად იყვნენ მიწვეულნი და შესაბამისი გადაადგილების საშვიც ჰქონდათ, თუმცა პოლიციამ დოკუმენტი არ ცნო.

"აქ ლაპარაკია იმაზე, რომ არ არის მითითებული თქვენი გადაადგილების გზაო. თქვენ უნდა ყოფილიყავით ოფისში, რაკი ოფისამდე იყო გამოწერილი საშვი", — განმარტა გოცირიძემ.

დღეს ასევე ნაციონალური მოძრაობის ერთ-ერთი ლიდერი, ხატია დეკანოიძე 2 000 ლარით დააჯარიმეს.

მთავრობის 9 ნოემბრის დადგენილებით თბილისში, ბათუმში, ქუთაისში, რუსთავში, გორში, ფოთსა და ზუგდიდში 22:00 საათიდან 05:00 საათამდე გადაადგილება, როგორც ქვეითად, ისე სატრანსპორტო საშულებით აიკრძალა. ასევე, აიკრძალა საჯარო სივრცეში ყოფნა. დადგენილების მიხედვით, აღნიშნულის დარღვევა იწვევს დაჯარიმებას 2 000 ლარით ფიზიკური პირებისთვის, ხოლო იურიდიული პირებისთვის დაჯარიმებას 10 000 ლარით.