შინაგან საქმეთა სამინისტროს ინფორმაციით, იდენტიფიცირდება და 2 000 ლარიანი ჯარიმა დაეკისრება ყველა იმ პირს, ვინც რეგულაციას დაარღვევს და 22:00 საათიდან 05:00 საათამდე გარეთ გადაადგილდება.

"მოგიწოდებთ, დაემორჩილოთ დადგენილ რეგულაციებს, წინააღმდეგ შემთხვევაში, აღნიშნული ქმედება წარმოადგენს ადმინისტრაციულ სამართალდარღვევათა კოდექსით აკრძალულ ქმედებას და იწვევს დაჯარიმებას 2000 ლარით ფიზიკური პირებისათვის, ხოლო 10 000 ლარით იურიდიული პირებისათვის", — აცხადებენ უწყებაში.

საქართველოს დიდ ქალაქებში, მათ შორის თბილისში, დღეს, 22:00 საათიდან გადაადგილების უფლება იზღუდება. ამის მიუხედავად რუსთაველის გამზირზე დემონსტრანტები დაშლას არ აპირებენ და დამოურჩილებლობას აცხადებენ.

რამდენიმე აქტივისტი ათი საათის დადგომამდე რამდენიმე წუთით ადრე დააკავეს. როგორც სირცხვილიას მოძრაობის წევრები ამბობენ, დაკავება სწორედ "დაუმორჩილებლობის" აქციას უკავშირდება.

შსს-ს ინფორმაციით, ამ დროისთვის დაკავებულია 4 პირი. საქმეზე გამოძიება ადმინისტრაციულ სამართალდარღვევათა კოდექსის 166-ე და 173-ე მუხლებით დაიწყო, რაც წვრილმან ხულიგნობასა და პოლიციისადმი დაუმორჩილებლობას გულისხმობს.

აქციაზე იმყოფებიან ოპოზიციური პარტიის ლიდერები, რომლებმაც მომხრეებს მოუწოდეს, აქციაზე დარჩენის გადაწყვეტილება ინდივიდუალურად მიიღონ.